Read Angami Naga Job 2 Bible Online

Job 2 - Angami Naga bible

Job 2

¹Khunhie puo Ukepenuopfü nuonuoko Jihova mhodzünu u thuo u khashütuoü vor, tsiu Satan[2] rei puo thuo puo khapie Jihova mhodzünu shütuoü vor.

²Sitse Jihova sie, Satan[3] ki, “No kirapuo nu vor ga?” idi ketso, sitse Satan-e Jihova die kela di sie, “Kijü nu rühou lukihaki tuo, mu sügei kho mu ke tuo di vorwe” sishü.

³Sitse Jihova sie Satan[4] ki, “No a kituou Job dze leshüya mo? Kijü nu themia puo kemhiekecü puorei tuo mo, puoe vitsei mu themia kemezhü puo, puoe Kepenuopfü preiya, mu mha kesuou rütseya. No a chü pie a bu puocapuola kejü nu puo pekatuoü puo pesuota zorei, puo tsie rei puo kese se di miatho ba zo” sishü.

⁴Sitse Satan-e[5] Jihova die kela di sie, “Puozhüu sou puozhü zo, themia rei puo kerheiro la puo keba pete khashüwatuo.

⁵Derei no tsie n dzie yhashücie, sidi puo ru tsiu puo chü bieshü phi, sitse puoe, n mhodzünu nu n rüsetatuo” sita.

⁶Sitse Jihova sie Satan[6] ki, “Harie, puo n dzie nu bate derei puo kerheiro we nyü hiecie” sishü.

⁷Süla Satan-e Jihova mhodzünu nu tuota, sidi tichü kemeriekecü pie Job phitshü nunu kho puo tsüle ketso khashü.

⁸Siru puoe gali keprotso puo chülie di süu pie puo rha di mige nu bata.

⁹Sitse puo kimia puo ki, “No tsie rei n miatho-u se zo batieya me? Ukepenuopfü rüsewa[7] di siatacü mu” sita.

¹⁰Derei puo süpfü ki, “No thenu kenyapfü puo tuoi diepu bate, we Ukepenuopfü dzienu mha kevi ngulieya mu mha kesuo rei ngulie lho üme?” sita. Hako pete nu Job-e puo tie se kephouma pu mo zo.

¹¹Siro Job khriethomia seko mhakere hako pete puo gei vorcü silie tse, uko mia puopuokecü u thuo u kebachü nunu puo ki vor; Teman-u Elifaz, Shuhitmia Bilda mu Namatmia Zofar, ukoe u keselie di puo nou thupeluotuoü vor.

¹²Mu ukoe kepetse nunu puo ngukeshü ki, uko puo silie mota, sitse uko pfhephra sie di krata; sidi uko pfhenei cierha mu nyophe kelhoupie uko tsü gei shüta.

¹³Sidi teisozha thenie mu teizeizha thenie uko puo ze di nyophe nu bata, mu miapuorei puo ki die yopuo rei pu mo, ukoe puo mezhieu rethorkecü nguketa la.