Read Angami Naga Job 20 Bible Online

Job 20 - Angami Naga bible

Job 20

¹Sitse Zofar, Namat-u puo die kela di:

²“Rünyülie! A nou keleu se n die kela nyüte, mu hau la a a nounyü beite.

³A kengakecü die a siliete, derei kesikele ruopfüue a bu die kelalie kevi se a pesishüte.

⁴No keriekithonu hau dze si mo zo me? Themia chüpie kijüu gei shükeshü yawinu.

⁵Süusü kerüzhümia kuokeba puotei huoyo la zo, tsiu u kepele kejümia keneiu dopuo ki la zokecü si mo zo me?

⁶Uko thuo rükrie kho teiko thuba shierei, mu u tsü thuo kho kimhouko thuba shierei,

⁷uko thuo uko buo tuoi kechachie la jütatuo; uko ngukeshümia, uko kirapuo ba ga?” situo.

⁸Ukoe u mho tuoi pruotatuo, mu süko ngu lalie lho; theva gei ziemho tuoi uko whuo petawatuo.

⁹Themhi uko ngukeshüko uko ngu sa motatuo, morei uko kebachüu uko meho salie lho.

¹⁰Uko nuonuokoe kejümia neiu chütuoü sietuo, mu uko dzie-e uko kinyiko kha lashüwatuo.

¹¹Uko moe va puo khriekesamia phoukekuotho-u tshu, derei süu uko ze di nyophe nu zhütatuo.

¹²Uko me nu kerüzhüe moukeze zorei, uko süu se uko meü khro kevie seba rei,

¹³uko süu khawa mo di seba zo, mu süu khawa nyü mo di se uko me nu ba zo,

¹⁴sirei uko kecücae uko vanu rüpfhürüla bate, süu uko nou nu tinyhü mhitsie kerhupfü chü bate.

¹⁵Uko kinyi mezulie, mu süko merü lashütuo. Ukepenuopfüe uko va nunu uko bie kelhouwatuo.

¹⁶Puoe tinyhü mhitsie kerhupfü metelietuo; nyhübvüpfü meüe uko reikhriwatuo.

¹⁷Uko kerüko, mepfhidzü mu mithunudzü krukezhü rücüko meholie lho.

¹⁸Uko mhathomhachü seiko pie mia tsüwatuo, tsiu süu mezu kelie lho; uko thelhitheü nu prakelie kinyi se uko neilie lho.

¹⁹Ukoe mhakejümia pese tsiu uko rünyü mocü la, uko thuo chükemo kiu mvürümvü di selieketa la.

²⁰“Kekreilamonyü uko mhakemehou-u kemekrie baya mo; uko mha mehou kebau nunu mhapuorei süu therhieta lho.

²¹Uko cükelie sie mhapuorei peshapie balie lho, süla uko kinyiko ba salie lhote.

²²Uko ketshukelhuo chükeba donu ukoe uko ziekejü chü batatuo; mhakere kepeka pete uko gei vortuo.

²³Mha pie uko va ketshu chülietuoü keba ki, Ukepenuopfü noupfhü khapie uko geishütuo, sidi uko mhacümhakrie keba ki süu ru pie uko ca chüshütuo.

²⁴Ukoe thegi rünyie mhodzü tazhütuo; mu sethi theü puo va phowatuo.

²⁵Süu shüzoushü tse uko mo geinu partuo, zhiecha phriephriekecü uko thesieu nunu partuo; kemeriekecü uko gei vortuo.

²⁶Mha kezei pete uko la keviepie bate; mi mheshü kemo puo uko thewatuo; uko pfheki nu kedipuo peshapie ba shi süko thewatuo.

²⁷Teiko uko kephouma chü nyü di chücüko thashütuo, mu kijüe uko petsou siertuo.

²⁸Uko kinu keba vieko chüsetatuo, tsiu Ukepenuopfü noumeyiekelietei nhie uko nyaürako ze jütatuo.

²⁹Kerüzhümia hakemhie di Ukepenuopfü kinu u ya ngulietuo, Ukepenuopfü uko la keyiekeshü zho-u hamhie zo” si.