Read Angami Naga Job 21 Bible Online

Job 21 - Angami Naga bible

Job 21

¹Süsie Job-e puo die kela di:

²“Menuo di a dieko rünyüshücie, mu hau pie nie nou thupeluoliecie.

³A ze shügeshü di a bu diepushüthie; mu a diepukewa sienu, a krebacie.

⁴A la zowe, a themia gei ja baü me? Kiüdi a shügeshühie motuo ga?

⁵A mehoshücie, di nie ngo bacie, sidi nie dzie pie nie tie keguliecie.

⁶A süu rükrakeshü ki a ziejütaya, mu pekhrukhrukecü a mo gei vortaya.

⁷Kiüdi kerüzhümia bu rhei vo tsakelie tsolie, tsiu u kekuo kuo miemietaya shi?

⁸Uko nuonuokoe uko kebanu u kelhou keselie, mu uko geinu keparko u mhinguki baya ze.

⁹Uko kiko kemichie nunu kelalie, mu Ukepenuopfü noupfhüu uko gei tuo mo.

¹⁰Uko thudo kruolieya, tsiu jütaya mo; uko thukrü penuolieya siro krütaya mo.

¹¹Ukoe nhicunuoko tekuo krodi tuoi ketseshüya, tsiu uko nuonuoko nashü baya.

¹²Ukoe thetsei tsiu nyarübou se thepfhechü, tsiu luoü kekhou pfhe ze di u nei baya.

¹³Ukoe kinyi se u tei pevoya, mu noune nunu Sheol nu tsutaya.

¹⁴Ukoe sie Ukepenuopfü ki, ‘Hie kinu tuotacie! Hie n mhasimhale chako mehou mo.

¹⁵Kiüdi Kuokejokejüu[39] hie bu puo lie chükecü mese üba ga? Siro hie puo ki chakecü kedipuo kemevi ba ga?’ si baya.

¹⁶Harie, uko kruokelieu uko dzie nu ba mo me? Kerüzhümia mharhüu a ki nunu petse vote.

¹⁷“Kerüzhümia mitubou va kitsuo pemhewawaya shi? Uko kepekau va kide uko gei vorya shi? Ukepenuopfü nouyie geinu va kidepuo kepechü khashüya shi?

¹⁸Ukoe teikhrie mhodzü rügu kemhie, tsiu teikhrie khriedi bu hepfütaya kezha shübe kemhietaya shi?

¹⁹Nieko sie, ‘Ukepenuopfüe uko kesuokechüko uko nuonuoko la kengupie zhüte’ siya. Puo bu süko zhakhrako chüshücie, sitse uko süu silietuo.

²⁰Uko mhi thuo uko kepeka ngucie, mu uko bu Kuokejokejüu[40] noupfhünouyie kriecie.

²¹Uko kelhouzhako tseiketa sie, uko siekeba uko kinuko la kedipuo chü salie ta?

²²Mia puo mhasimhale se Ukepenuopfü pethalie vi me? Puoe kerükrie nu kebamia ketsoyakezhau zokecü ngu ba ze ru?

²³Mia puoe mhanyi phikeba ki, lhou rüü mu khrukhre ba ürei,

²⁴puo moe luo phi, tsiu puo rue puo kelei thuo tshu ba zorei siataya.

²⁵Kekreimia puoe thenoukemezhie phi, mu mhakipuorei mha kevi metha mo zo di siataya.

²⁶Unie kenienie kemhie di nyophe nu zhütaya, tsiu zochüko thuo unie zepfü zhütaya.

²⁷“Harie, a nie nouleko si, tsiu nie a gei puotou kemo rhükecü si ba.

²⁸Kekreilamonyü nie-e sie, ‘Kedinuomia kirapuo ba ga? Kerüzhümia kebachü kirapuo ba ga?’ siya.

²⁹Nieko cha nu rüvemia ketsoshü mo me? Tsiu nie uko zhapudieko lielie mo me?

³⁰Kepeka teisozha nhie kerüzhümia lhieshüya mo me? Noupfhünouyie teisozha nhie uko kelalieya mo me?

³¹Supuonie puo mhodzünu uko dze pushütuo ga? Mu supuonie uko mhachükeshüko la uko zha chüshütuo ga?

³²Uko mekhru nu tsuketa ki, mekhru kepfhe khapie bawaya.

³³Kijü razha nu nyokroko puo neitaya; tsiu puo mhodzü themia phrü hulie kelho voketa tuoi, themia pete puo sie whuo votuo.

³⁴Siliro, kiüdi nieko kemethuo pie a nou thupeluoya ga? Nieko diepu nu mha kemeda bakecü sie mhapuorei ba mo” sishü.