Read Angami Naga Job 22 Bible Online

Job 22 - Angami Naga bible

Job 22

¹Sitse Elifaz Taman-u puo die kela di sie;

²“Mia puoe Ukepenuopfü bu puo la mevikelie chülie vi me? Mhakesiue puo thuo puo la mevikelie mhiei.

³No miatho üro, süu la Kuokejokejüu[41] bu puo kenei huo batuo me? Morei n chako chüpie mesa tseikelie la puo bu puo kepra ngulieya me?

⁴No puo preikecü la puo n pethashü, mu n ze vo dienyakecütuoü mo me?

⁵N kerüzhüko zha phi mo me? N kesuokechüko puo thela jü zo.

⁶Noe puocapuola jü di n kikru bu u die khashüte, tsiu puo pfhe puo nei lheseta di puo bu methuo tuote.

⁷No u nyieketuomia bu dzü krietuoü khashü mo, tsiu niekhrüda pie kemerümia tsü mo di khase bate.

⁸Kekuomia kijüu pevielieya, tsiu puo neimia bu sünu lhou baya.

⁹No samipfüko bu methuo di ketsewa, mu merünuoko bou bietshewate.

¹⁰Süla kebieko n houpfübate, mu kemichie mhai vor n vuopfülie.

¹¹Morei zeibouikecü, süla no mha ngulie kenjü; tsiu dzüdi n houpfü bate.

¹²“Ukepenuopfü tei pesoko gei ba mo me? Themvü kerükriethoko mehoshü phi, süko kide rükrie shi!

¹³Süla no sie, ‘Ukepenuopfü kedipuomhie di silieta? Puo kesoukezei nunu mia nyiekecülie vi me?’ sibaya.

¹⁴Kimhou shüde-ikecüko puo zepfülieketa la, puo mha ngu mote, sidi teigei nu rüwhi tuote.

¹⁵Kerüzhümia kevo cha keweu no mehoshü me?

¹⁶Puo teiu mhodzü süko dathewate; süko mvüdzeu dzüdi bu vawate.

¹⁷Ukoe sie Ukepenuopfü ki, ‘Hieko kinu tuotaliecie’ tsiu ‘Kuokejokejüu[42] hie la kedipuo chüshü ta?’ siya

¹⁸Sirei, puoe mha kevi pie uko ki ketshu chüshü, derei kerüzhümia kepethae a kinu pecie tuote.

¹⁹Kemiathomia süu ngu di u neibaya, kejokejümia süko krenyü baya.

²⁰Sidi sie, ‘Uko kepetsoumiako dathewate, mu uko mha pesha pie kebako mi bu thewate.’ siya.

²¹“Ukepenuopfü ze kepfhekholie, di kezeviliecie, sitse keviu n gei vortuo.

²²Puo tie nu puo kepethadieko lieliecie; mu puo dieko pie n melou nu shüse baliecie.

²³Mhanuü no Kuokejokejüu ki rürei vorlie, mu n pfheki nunu kephouma chükedeipie kepetse nu shüwa ro no lhoulietuo.

²⁴Mhanuü no suna pie nyophe tuoilie, mu Ofir sunapfü pie rücürünuo nu ketsie tuoilie,

²⁵mu Kuokejokejüu[43] pie n suna mu n rakachü kevitho-u mhielie liro,

²⁶noe Kuokejokejüu[44] geinu n neilietuo, tsiu ngosie Ukepenuopfü meholietuo.

²⁷No puo ki n mezhiemelotuo, mu puo n pfhe rünyülietuo, tsiu no phrakeshüko chüshü puo tsütuo.

²⁸No mhapuo chütuoü pepilie zorei, süu n la chüparlietuo: tsiu kezieu n chako va pezielietuo.

²⁹Themia chü kerünuokeshü ki, noe sie kemiakokecü la üdi noe putuo, kekreilamonyü puo thenou kerünuomia kelashüya.

³⁰Puoe kejokechümia zorei kelashütuo, n dzie mesakecü la uko shüphralietuo” sishü.