Read Angami Naga Job 24 Bible Online

Job 24 - Angami Naga bible

Job 24

¹“Kiüdi Kuokejokejüue[47] puo teiko se balie mote shi? Kiüdi puo siyakezhamia puo teisozhako ngu mote shi?

²Kerüzhükoe kijü rieko phekedeiwaya, uko tekuo krodi whuo zetaya, sidi süko vachütaya.

³Ukoe merünuomia gada whuozetaya, uko samipfüko thudo pfhekhodie la setaya.

⁴Uko ketsopfhüko whuopie chakhie shüwaya; sidi kijü nu kejümia pete bu u thuo u kevie se bataya.

⁵Kijü kesia nu gadapfü tuoi, ukoe uko mhathonu voya, uko nuonuoko la kecüca pfhü rayha nu voya.

⁶Ukoe mia lie relieya, mu uko kerüzhümia khubelie bielieya.

⁷Ukoe u pfhe u nei se mo di teizeizha pete methuo zhüya, mu tei kesei ki uko kewhe ba mo.

⁸Ukoe kijüthou gei teirü bu uko petsezüi pfüzhüya, siro uko yalie nyü di tsiekrie pfepfü zhüya.

⁹“Ukoe u puonuo kejüko merü nunu u teshü setaya, tsiu u die phrashü di kejümia nuonuo zetaya.

¹⁰Ukoe pfhenei se mo di methuo tuo voya, uko merü zorei telhakre pfü tuoya.

¹¹Ukoe lieko nunu tier chü se parya, ukoe khubezu donu tuo voya, derei terhü di kemezhietaya.

¹²Siatatuoü kezhüko nadi nu meheimelo, mu rüzako mezha nu kekhruohi cha, sirei Ukepenuopfüe uko kechau sikemo chütaya.

¹³“Ukoe kezieu ze keperhieya kezhako, uko chako siya mo, mu cha süko nu tuoya kemoko.

¹⁴Mia kedukhriu kezeiu nunu sier di kejümia mu ketsopfhümia dukhrituo, mu teizei gei ro puoe kerügumia tuoituo.

¹⁵Pieü kechüu mhi rei teizei tie pfhebaya, di sie, ‘Miapuorei a ngulie lho’ ibaya, sidi puo zie chüpekrei baya.

¹⁶Teizei gei ukoe kiko rhielieya, khinhie gei ro uko thuo uko khapfü baya, sidi uko kezieu siya mo.

¹⁷Khise zorei uko la zowe zeiboui zo; ukoe zei kemeriekecü zemiatacü la.

¹⁸“Dzü gei ukoe mhai votaya, kijüu gei uko yau rüsewate; miapuorei rürei uko khubelie chau nu voya mo.

¹⁹Teiso mu kele thuo pekrie dzüko te pesowate; Sheol rei kephouma gei sükemhie chüshütuo.

²⁰U zuo va zorei uko rükra mote; ukoe zochü menu lhetuo; uko rükra sa mote, süla kerüzhümiae seibo tuoi bietshewatuo si baya.

²¹“Ukoe nuojüpfü peseya;[48] tsiu samimia gei puo zho viya mo.

²²Sizorei Ukepenuopfüe puo kekuo geinu kekuomia bu rhei chalieya, uko kelhou kemerü jüketa ki uko la sielieya.

²³Puoe uko bu khrukhre balieya, mu uko yapieshüya; tsiu puo mhi-e uko chako mehobaya.

²⁴Ukoe zopuo nu meyiemeluo sierya, di votaya; ukoe rüwitaya mu kekreimia mhie rataya; uko telhakre tuoi rewaya.

²⁵Mhanuü siü liro, supuonie a üse kecürümia ükecü pulie ta, mu a diepuko puo kemevi bakemo thashülie vi ga?”