Read Angami Naga Job 27 Bible Online

Job 27 - Angami Naga bible

Job 27

¹Siro Job-e dievi nunu mhapu sa di:

²“Ukepenuopfü rheiketuo mhiei, supuonie a mezhüu se seta ta, tsiu Kuokejokejüu,[50] supuonie a kelhou chüpesuolie ta?

³A keha a gei kebachie, mu Ukepenuopfü ruopfü a nyhü nu kebachie.

⁴A tie bu mha kesuo pulie lho, morei a meü bu mhakese die pulie lho.

⁵A nieko üse mezhüücü pulie lho, a siata kemochie a miatho-u a geinu chüwalie lho.

⁶A a kemiatho-u thezetsa seba zotuo, mu süu bu tuotalie lho; a teisozha kehoupuo nhie rei a nou bu a pejolie lho.

⁷“A ngumvümia bu kerüzhümia tuoitacie, tsiu sier a petsouyakezhamia bu miathokemomia tuoitacie.

⁸Kekreilamonyü Ukepenuopfü puo rhuo kejümiako dathewa mu uko kerheiro seketa ki, puo kemerüu kikecüpuo ta?

⁹Kemezhiekecü uko gei kevor ki Ukepenuopfü uko pfhe rünyütuo me?

¹⁰Ukoe Kuokejokejüu[51] ngu uko neilietuo me? Puotei pete nu ukoe Ukepenuopfü kie sei balietuo me?

¹¹A Ukepenuopfü dzieu dze se nieko pethashütuo, Kuokejokejüu gei kebau a keviewalie lho.

¹²Nie pete nie thuo rei süu ngushüte; siliro nieko pete kiüdi kemenaya ga?

¹³“Ukepenuopfü kinu kerüzhümia yau hakemhie, tsiu mia peseyakezhamia kayie wekelie hakemhie di Kuokejokejüu[52] kinu ngulietuo.

¹⁴Mhanuü puo nuonuo lhou kralie zorei, süu zhiecha la zo; tsiu uko geinu keparko kecüca u kelhuo ngulie lho.

¹⁵Uko geinu peshapie kebako kesia nunu uko khruwatuo, mu uko samipfüko thekrüchülie lho.

¹⁶Uko thuo rakachü pfhepie nyophe tuoi pieba shierei, mu pfhenei kesepie nyoba tuoi pieba shierei.

¹⁷Uko süko kese sebalie vi, derei kemiathomia süko dziemeneituo, tsiu kejokejümia rakachü kezatuo.

¹⁸Ukoe perakru tuoi uko ki chüpie kebau rükhoumia khubelie nu rükhouba chüpiekeba tuoi zo.

¹⁹Ukoe kinyi se di zhütsu, derei sükemhie la salie lhote; ukoe mhirhoshü, mu sükoe jüta.

²⁰Mha kemeriekecü dzüdi mhie vor puo kenoupfütatuo, teizei gei teirükrierükhrie vor puo hepfütatuo.

²¹Niathutsa teikhrie uko hepfütaya mu ukoe tuotaya; mu uko kebachü nunu uko hepfütaya.

²²Uko ngumezhie motuoü di uko gei tsurtuo; uko süu kekuou nunu tatatuoü urhiechütuo.

²³Miae puo la dziedatuo, tsiu puo kebachü nunu puo rütsetuo.