Read Angami Naga Job 28 Bible Online

Job 28 - Angami Naga bible

Job 28

¹“Rakachü kethiechü puo batou zo, tsiu suna chü kemesakecü thechü puo ba tou zo.

²Kijüu geinu thegi chü se parya, tsiu ketsie geinu priesachü thepezhalieya.

³Ukoe zeibouikecü se puo thela chüwa, tsiu kesoutho nu keba ketsie, kezei mu zeide-ikecü nu ketso rei pfhü voya.

⁴Themia lhoukeba chü tsekevo razha nu, rüvemiako uko rükra motaya; ukoe sotaya, ukoe themia mhodzü kinu tuo motaya.

⁵Kijüu la liro, süu geinu kecüca parya, derei süu khro mi kemhiei tuhiehiepfü baya.

⁶Sünu ketsieko gei safir baya, tsiu süu nyophe gei suna baya.

⁷“Pera puorei sikemo, tsiu chürhaü mhi rei ngukemo chatse puo zhü.

⁸Kekhriekezei khunuo puorei sünu vo mo zoluo, loshapfü rei sünu pfüthe vo mo zoluo.

⁹“Puo dzie chapie tsiekrie geishü, mu kijüthouko phi nunu kijüthouko thupelawa.

¹⁰Puoe tsiekrie geinu kerü dushü; tsiu puo mhi-e mhamakere khe mehoya.

¹¹Puoe rücü bu kru rüyopfüta motuoü deiwaya; tsiu mha keviepiekebau puoe se par kezie nu shüwaya.

¹²“Derei kirapuo nu mhasi ngulie ta? Tsiu kesikele thau kirapuo ba ga?

¹³Themiae süu ma si mo, mu süue rheikeba kijünu ngulie mote.

¹⁴Mha kesoue sie, ‘Süu a gei tuo mo?’ siya, mu dzükezhae sie, ‘Süu a ze ba mo’ siya.

¹⁵Süusü suna mese nu ngulie kenjü, morei puo ma chütuoü raka mejüshülie kenjü.

¹⁶Ofir suna, onix ma kerepfü morei Safirpfü pie puo ze kemejülie kenjü.

¹⁷Suna mu kristal süu ze kethedelie kenjü, morei suna kevipfü pienyie pie süu ze kelilie kenjü zo.

¹⁸Koral morei kristal pukecüpfü mo, mhasi mae Pearl ma ki rei rekuocü la.

¹⁹Ethiopia[53] nu krisolite pie süu ze kemejülie kenjü, morei süu pie suna kevipfü ma ze kethedekecü chülie kenjü.

²⁰“Di siro mhasi kirapuo nu vorya ga? Mu kesikele thau kirapuo ba ga?

²¹Süu rheikebako pete mhi nunu kevie se ba, mu teirako kinu kevie se ba.

²²Mhakepeka mu kesiae sie, ‘Hie hie nyie pie diekrie süu sishüte’ siya.

²³“Ukepenuopfüe süu dze si ba, tsiu süu tha si ba.

²⁴Kekreilamonyü puoe kijü kela ketso mehoya, tsiu teiko khro mha pete ngu ba.

²⁵Teikhrie chü kemesishütuoü, tsiu mejü di dzüko mesi mehoya.

²⁶Puo teirü la thezho khakeshü ki, mu teise ki teikemela chakeshü ki,

²⁷puoe süu ngu, mu süu pushü, puo süu chüshü, mu süu pfhü se parshü.

²⁸Tsiu puoe mia ki, ‘Harie, Jihova khrü preikelie, süusü mhasi zo; tsiu mha kesuo therhiekelie-e kesikeleu zo’ iya” sishü.