Read Angami Naga Job 29 Bible Online

Job 29 - Angami Naga bible

Job 29

¹Siro Job-e puo dieviu pu la di:

²“He-i, a bu voketa thekhrüko, Ukepenuopfü a sekeba ki mhie ba ücü we;

³puo mitue a tsü va peziekeba ki tuoi, tsiu puo kezie nunu a tuo kezei pfüthe kevo ki tuoi.

⁴A khriesa teiki tuoi, Ukepenuopfü kekhrieu a pfhekiu mhogei keba ki;

⁵Kuokejokejüu[54] a ze ketuo ki, a nuonuoko a khieki keba ki.

⁶Thunudzü pie a phichako khrükewa ki, mu tsiekrieu tier rupie kerü kemhie a tsüya kezha ki!

⁷A nadi pfüthe kharu nu kevo ki, a chaü nu a ba chükelie ki.

⁸Khriesako a ngushü di rüshüta, ketsako siethalie di thathata.

⁹Kedinuoko u die kethelie, di u dzie pie u me kegulie.

¹⁰Pehümiako kemekrie bata, tsiu uko meü kho uko me kupfübata.

¹¹Themia nyietoe a pfhe sikeshü ki, süu a üse thejakepfüu üdi a kie, mu themhi a ngukeshü ki, süu a zhapu chüshüya;

¹²Kekreilamonyü a kraketuo mhakejümia kelashü, mu u kekhruo kejü merünuomia khruohishü.

¹³Katatuoü kebau theja a gei vorta, mu ae samipfü nou bu puo nei di chielikelie chüshü.

¹⁴Ae kemiatho chüpielie, sidi süu dzielie, a kemezhüue pfhenei mu tsüze kemhie zo.

¹⁵Mhiciemia la a themhi zo, mu phiyhomia la thephi zo.

¹⁶Ae kejümia krü zo, mu ae sikemo themiau keya rei zo.

¹⁷Ae kerüzhümia mecoru dutshewa, mu puo hu nunu mha pekakelieu teshü se parshü.

¹⁸Süsie a lecü, ‘A a kru nunu siatatuo, tsiu a zha theshünyo mhiei chü pekralietuo,

¹⁹dzüko khieki a mie-e krapie ropfüba, thezei-e teizeizha pete a coko vazhüya.

²⁰a zayieu sü a gei rheirhie ba zo, tsiu a dzie nu a theü kesa miemiezhü zo’ ibaya.

²¹“Themiako a pfhe rünyüya, sidi pfhe baya, tsiu kemekrie di a tarhokeshü rünyü baya.

²²A mhapukeshü sie uko diepu laya mo; tsiu a die uko nou lelieya.

²³Teirü kepfhe tuoi uko a pfhe baya; tsiu ukoe mekuo pie teirü kenuou kepfhe tuoi baya.

²⁴Uko kethepfu jüketa ki a uko krebaya; mu a zie kezieu uko meliewaya mo.

²⁵A uko chau kedashü, sidi kezhau chü, tsiu chüpahiko donu kediu tuoi, thekrükechüko nou thupeluoyakezhau tuoi zo.