Read Angami Naga Job 3 Bible Online

Job 3 - Angami Naga bible

Job 3

¹Süsie Job-e puo tie tiehie sie di puo kepenuo teisozhau rüseta.

²Mu Job-e sie;

³“A penuokelie teisozhau, tsiu tsiezhü ‘Thepfunuomia puo nuonipfüliete ho,’ sidi pukeshü teizeizhau bu jütaliecie.

⁴Teisozha sünhie bu zeibouitacie! Ukepenuopfü bu peso geinu süu le, morei kezie bu le süu va hiecie.

⁵Thedzü kezei tsiu kezeikesou bu süu pevielietacie. Kimhou bu sünu batacie, teiso gei teimekiekecüu bu süu kechükedewacie.

⁶Teizei zha süu zeide-ikecüu bu süu lieliecie! Teicie teisozhako donu süu bu puo nei hiecie; thekhrü phrükecü ki süu sa phrü hietacie.

⁷Hou, teizeizha süzhü bu nuojü chü talie, süzhü u kenei pfhe puo rei si[8] hiecie.

⁸Dzükezhau rüseya kezhako, Leviathan kesoushüyakezhako bu süu rüsewacie.

⁹Teisotie themvüko bu zeitalie; süu kezie merü ba rei, puo rei ngu hiecie; morei süu bu khise teiso-u ngu hiecie.

¹⁰Süue a zuo va nu kikha khawa mocü la, morei a mhi nunu thenoukesuo kevielie motacü la.

¹¹“Kiüdi a nie a penuokelie ki siata mo shi? Kiüdi a a zuo va nunu par mu a tei vota mo shi?

¹²Kiüdi puo khoudza nie ayalie shi? Kiüdi a bu nulie kevi nudzü ngulie shi?

¹³Tsie a kemekrie mu zeizhüketa mesete, a ze keta mesete; sitse a rülei zhütatuo.

¹⁴Kedimia mu kijü nu mia tahitarhoyakezhamia, u thuo u la ruozhüketako chü lalieyakezhako,

¹⁵morei kedinuo suna kenyimia, rakachü pie u ki tshupfhü kebako ze batatuo.

¹⁶Morei kiüdi nuokra chükewamia tuoi a keviewa mo shi? Nuoranuomia kezieu ngu moto zokecü nuonuo tuoiwa mo shi?

¹⁷Sünu kerüzhümia mha kebvükecü jü; mu sünu unyieketamia rülei bataya.

¹⁸Sünu kediemiako keze rüleitaya; sünu uko uko kemehoko pfhe siya mo.

¹⁹Themia kecükezha sünu ba, tsiu miadiemia puo niepumia dzie nunu puo khase ba sa mote.

²⁰“Kiüdi themia kemenga ketuou la kezie khashüya ga? Mu kerheiro pie themia puo noukemezhie ketuou tsüya ga?

²¹Puo kesia mengu, derei süu vorya mo; tsiu puoe kinyi kevie pie kezhü pfhükecü ki rei süu thie pesou leya;

²²supuo mekhru ngukelie ki u nei lhe mo, tsiu u dzüzie partaya ga?

²³Kiüdi kezie pie themia puo kevocha nguya kemomia, siro Ukepenuopfüe chü pie puo bu lhou kerübe ketuomia tsüya ga?

²⁴Kekreilamonyü a noukesuou a niekhrüda tuoi[9] vorya, tsiu a meheimelokecü dzü kemhie lashü.

²⁵Kekreilamonyü a mhaprei rei preithor kebau a gei phirte, tsiu a michie ketuou a gei vorte.

²⁶Ae lhou rüü vor mo, morei a kerülei rei jü, morei a kemekrie ba mo; sirei kemezhiekecü vorte” sita.