Read Angami Naga Job 30 Bible Online

Job 30 - Angami Naga bible

Job 30

¹“Derei tsie we, a ki kenhicu kro puo, a u krünuo bu tefü ze di, a kuoko pfhetuoücü rei chüsü mo zokecü kro puo bu a krenyübate.

²Kedipuomhie di uko dzie kekuou nunu a kemevi ngulie ta? Themia u phoukuotho-u voketamia zeru.

³Kemehou mu kemerü la ukoe rayha, mu mhalhouya kemora tuota.

⁴Ukoe nhado nunu nhanyüko thecü, tsiu seimie thie pie uko ca chü.

⁵Themiako do nunu uko whuowate, kerügumia tuoi uko shiekhoui di uko sie whuo vo.

⁶Uko bu kijü puokhiehe kechüra, kijü kecieki nu, tsiu tsiekrie nu lhou morosuo.

⁷Uko nha donunu meheimelo, uko vo zohu khro nu kengulie.

⁸Mhalekemo, zhasekepfümia nuonuo kijü nunu uko vüpetawate.

⁹“Mu tsie ae uko tsali puo chüte, ae uko diebo chüte.

¹⁰Ukoe a rütse, uko a kinu ta petse vote, ukoe a mho mhitsiekecü u kerei mo zo.

¹¹Kekreilamonyü Ukepenuopfüe a pha phreishü mu a chükerünuo shüte, ukoe mha medukelie kelhoupie a mhodzünu shü.

¹²A dzie a zatsa khriesako sier, ukoe a nekegewa, ukoe mhapekakecü zhoko se vor a petsou.

¹³Ukoe a cha biepesuowa, ukoe a mezhieko chü kehieshü; miapuorei uko kha mo.

¹⁴Dzü rüla ketsur tuoi ukoe a gei tsur; mhapekakecü donunu uko rütou a gei tsur.

¹⁵Kemeriekecüko a gei vorte; ukoe teikhrie tuoi a therhu whuotuote, tsiu a vikehielieyakezhau teikhrie tuoi pruote.

¹⁶“Mu tsie a ruopfüe a geinu kemezhie bate; kemezhiekecü teisozhako a teshü sebate.

¹⁷Theva gei a ruko a kethubate, tsiu a chie kerülei ngulie mo.

¹⁸Puo a kemvü chü a pfhenei telie;[55] süu a boulie gei vopha tuoi a pha sebate.

¹⁹Ukepenuopfü a kelhou pie nyoba nu shüwate, tsiu ae nyophe mu mige kemhiete.

²⁰A n ki a mezhiemelo zo, rei no a pfhekho mote; a siethalie sirei no a rüli le mote.

²¹Noe a gei n zho suo, no n dzie kekuou se a pechüte.

²²No a piesie teikhrie nu shü, no a bu süu gei tuotuote, sidi a vie ketuoko chüpejüwate.

²³No a ze vor kesia nu shüketuo, mu kerheimia la kese piekeba kiu nu shüketuo a siba.

²⁴“Uko puo kepeka la kraba zorei miapuorei puo dzie yhapie mekhru mho shülie lho.

²⁵Kemezhiekebau la a kra mo ba me? Kejümia la a ruopfüe puo nousuo mo me?

²⁶Derei a mha kevi pfhükecü ki, mha kesuo vorte; mu a kezieu pfhe keba ki kezeiu vorte.

²⁷A noue kemezhie bate, tsiu kerülei jü; kemezhiekecü teisozhako vor a ze kese.

²⁸A niaki sa mo di krakratuo, themia vor kehou keba nu a siethalie di kekhruohi cha.

²⁹A meseruko dzüriemia chü, tsiu putshüü khriethomia chü.

³⁰A zhü teimekie di a mo geinu tetsute, tsiu kele bu a ru thewate.

³¹A übou rei kekra pfhe chüte, tsiu a luoü thekrükechü pfhe chüte.