Read Angami Naga Job 31 Bible Online

Job 31 - Angami Naga bible

Job 31

¹“A a mhi ze dietseidiekho chülie; siliro kiüdi a rüü phousepfü puo mehotuo ga?

²Pesogei Ukepenuopfü kinu mha kikecüpuo a ya ba ga? Tsiu kerükrie gei Kuokejokejüu[56] kinu mha kikecüpuo pie a kayie chü ta?

³Kepekae kerüzhümia gei vorya mo me? Tsiu mha kesuo chüyakezhamia kepeka ngulieya moü me?

⁴Puo a zhoko ngu, tsiu a phichako pete phrü seba moü me?

⁵“Mhanuü ae kemeda nu tuoü ro, morei a phi mhaseketuo la ta rükri vota üro;

⁶Ukepenuopfü bu a kemiatho silieketuo la, roshükhou puotoukecü puo nunu a mejüshücie.

⁷Mhanuü a phichae cha vajopfü vota liro, mu a meloue a mhi ze tuota liro, mu thedo kesuo huo a dzie dapfü tuo liro

⁸a bu tsia prushü, mu kekreimia bu cüliecie, mu a la lhoukepar-u mie phewaliecie.

⁹“Mhanuü thenumiapfü puo bu a nou sekedowa liro, mu a siezanuou kikha ki a pfhe zhüü liro,

¹⁰a kimia bu kekreimia ki nyitacie, mu kekreimia bu nuke puo gei tsucie.

¹¹Kekreilamonyü hau kephouma kere puo; mha kesuo kechü süu la capiko siazha pie tsüya zo.

¹²Kekreilamonyü süu mi bu thethe vo pekawaya, tsiu a lieyie mie pete the pejüwatuo.

¹³“A kituo thenu rei thepfu rei a ki panyakeshü ki, a uko dze rünyü mvüta liro;

¹⁴Ukepenuopfü sierkecü ki a kedipuo chülie ta? Puo mha ketso kevor ki a kedipuo pu puo die kela ta?

¹⁵A zuo va nunu a chükeshüu puo rei chüshü mo üme? Tsiu mia puoe u zuo va nunu u rhishü moü me?

¹⁶“Mhanuü a kejümia menguu kha sebata üliro, morei a la samimia mhi bu suota üro;

¹⁷morei a rübei a nouva cüükrielie, di merünuomia bu süu cüükrie mo üro;

¹⁸a nhicu nunu u puonuo tuoi a merünuoko theke se siercü la, tsiu puo zuo va nunu puo chatha vor zo.

¹⁹Mhanuü ae themia kehoupuorei puo pfhenei jü di katazhükecü ngushü, morei kejümia puo kewhejü ketuo ngushü.

²⁰Mhanuü puoe jashü a tsü mo, tsiu a tekuo mie pie puo whe peleshü mo üro;

²¹mhanuü a kharu nu puo kekhruohi ngukeshü la, a dzie yhapie merünuomia petsouta ro,

²²a bou bu a bouka kere nunu rüzu tsutacie, tsiu a bou ru bu tseütsatacie.

²³Kekreilamonyü Ukepenuopfü kinu kepeka kevor-u a gei kemerie chüte, tsiu a puo kekuo kezha hielie rete.

²⁴“Mhanuü a suna pie a kemerüu chü, morei suna kevipfü üse a kepeleu chüta;

²⁵mhanuü a mhanyi phikecü la, morei a dzie-e mhangukelie la a nei bata;

²⁶Mhanuü niakiu zie zhakecü ki, morei khrü puo kezie cha nu tuokecü a meho bata,

²⁷mu a nou bu pekhre di mha seketsi, morei a tie bu a dzie mebo üliro,

²⁸haha rei mhatho kesuo la capimia bu siazha chüyakezha puo zo, a pesogei keba Ukepenuopfü gei jowaketa la.

²⁹“Mhanuü a ngumecüyakezhau kepeka ngukelie la a a neita, morei mha kesuo puo gei kevor ki a kemiakota ro,

³⁰Puo rüseshü di a tie bu phoumawalie lho zo.

³¹Mhanuü a pfheki nu keba themiako sie, ‘Puo muo üse puo kelhuo chükemo supuo ba ga?’ isiro.

³²chazoumia bu chaü nu zhütaya mo; derei a kikha khrü pie rüvemia tsüshüya.

³³Mhanuü a Adam kemhie di a kephouma whewa, a kesuokechü pie a merü nunu keviepfü tuota.

³⁴Kekreilamonyü a themia krodi preita, mu kikruko menyhakelie se a kedewata, süla a bu kemekrie bata, di kikha ciepra mote me?

³⁵He-i, mia puo bu a pfhe rünyüliecüwe! (Hauha a kemengu! Kuokejokejüu[57] bu a die kelashü üthienyü!) He-i, a ngumvümia a petsou di leshü thukeshüu a bu ba cüwe!

³⁶Süu pie a bouka gei toupfülietuo; tsiu süu pie a gei keditsüre puo tuoi toupfülietuo.

³⁷A phiyha kedithede ba shiü thashü puo kietuo, kedimia nuonuo puo tuoi a thuo a ki votuo.

³⁸“Mhanuü a kijüe sier a petsouta, mu liecha chüpiekezhüko sütuoi panyata liro;

³⁹Mhanuü süu sivükelie ae puoma khashü mo di cülie, mu süu niepumia bu puo kerheiro pejükewa chü liro;

⁴⁰telha sounu zohu bu lhou partacie, mu barli sou nu zozie bu lhoutacie” sishü. Job dieko tseite.