Read Angami Naga Job 32 Bible Online

Job 32 - Angami Naga bible

Job 32

¹Süla mia se hako Job die kela sa mota, kekreilamonyü puo thuo puo mhi nu puoü miathoüta.

²Sitse Elihu puo noumeyie parta. Puoe Job gei puo noumeyieta, kekreilamonyü puoe Ukepenuopfü kirei puo thuo puo üse mezhü üta.

³Puoe Job zemia seko gei rei puo noumeyieta, kekreilamonyü uko puo die kelalieketuo ngulie mota, uko Job üse joü puwa zoürei.[58]

⁴Siro tsie Elihue Job ki mhaputuoü pfheba, kekreilamonyü ukoe puo ki phichükuo.

⁵Elihue mia se hako die kelashüketuo ba moketa ngulie tse, puo nou meyieta.

⁶Tsiu Elihu, Barakel nuo Buzi-u puo die kela di, “Ae medzü ba zoluo, mu nieko we phichüte, süla ae a noukeleu pie nieko kieshüketuo rürei mu michie ba.

⁷A puya, ‘Teisozhako bu diepushücie, mu teicie kekraketae mhasi pethakeshü mese zo’ si.

⁸Derei themia gei kerheiro puo tuo, Kuokejokejüu[59] hükeshü geinu puo bu kesikele ngulie.

⁹Themia kekra puotei pete nu mhasi zotuoya mo morei phichüketamia rei mhakemezhüu caüla silie motaya

¹⁰Süla a puya, ‘A pfhe rünyüshücie; a bu rei a noukeleu pushücie’ sishü.

¹¹“Harie, a nieko dieko pfheba, nieko kedipuo putie shikecü lekeba ki, a nieko mhasi diekepu rünyü ba.

¹²A nieko pfhe rünyüshü, sirei miapuorei Job kejo-u thashü mo, morei puo dieko kelalie mo ze.

¹³Niekoe sie, ‘Hie mhasi nguliete; Ukepenuopfü thuo puo chü kerünuowatuo’ isita hiecie.

¹⁴Puoe puo dieko pie a petsou mo zo, mu a nieko dieko se puo die kelalie lho.

¹⁵“Uko u ngo bata, ukoe puo die kela sa mota; uko diepu laketuo ba sa mota.

¹⁶Uko diepu sa moketa la, uko süki tha di puo die kela sa moketa la a bu pfhe batuo me?

¹⁷A rei a kitsatie nu die kelashütuo, a rei a noukeleu thashü kietuo.

¹⁸Kekreilamonyü a gei die kekra ba, ruopfü a nou kebau a hübate.

¹⁹Harie, a meloue khubezubou puo kecieki ba kemo mhiei; süu chüzhü sü kesa nu kemhie pfüpha partatuoü bate.

²⁰A kerülei ngulieketuo la, a diepu morosuo beite; a tie tiehie sie di puo die kela morosuo beite.

²¹A a neimia si kreitalie lho morei miapuorei rhu pekreitalie lho.

²²Kekreilamonyü a mia rhu pekreikecü chülie si mo, sikecü sie a chükeshüu zopuo nu a chüsetatuo.