Read Angami Naga Job 33 Bible Online

Job 33 - Angami Naga bible

Job 33

¹“Derei tsie, he-i Job, a pfhe rünyüshü, mu a dieko leshücie.

²Harie, a tie tiehieshüte, a meü a me nunu diepu ba.

³A dieko a nou kemezhüu se putuo, a tie kedipuo siba shiü uko süu pu menuoshütuo.

⁴Ukepenuopfü ruopfüu a chüshü, tsiu Kuokejokejüu[60] thesü kerhei khapie a tsüshü.

⁵No chülie vi ro a die kelashücie, n thau se thalie di a mhodzünu nu n dieko kesieso di pushücie.

⁶Harie, Ukepenuopfü mhodzüki we a rei n mhie zo; a rei rünyo nunu a chülie.

⁷Harie, a kemichieu n chüpie n bu michietalie lho, morei a dzie n gei mesitalie lho.

⁸“No a kesi kinu, diepushüta ketho zo; mu a n dieko siliete.

⁹Noe sie, ‘A mesa zo, kephouma a gei tuo mo; ae mesa, mu mha kesuo kechü a geituo mo.

¹⁰Harie, puo a petsouketuo cha pfhüzhie, puo a üse puo ngumvümia übate;

¹¹Puoe a phi pie phikha nu shüshü, mu a cha pete mehobaya’ si.

¹²“Harie, hau nu no puo tou mote. A n die kelashütuo. Ukepenuopfü themia ki zhakuo zo.

¹³No kiüdi puo perhie, di sie, ‘Puoe a dieko puorei kelashü mo’ isiya ga?

¹⁴Ukepenuopfüe va puo nu mha puya, mu va kenie rei puya, themia thuo süu silieya mocü la zo.

¹⁵U mho geinu theva gei ziemho nu, themia ze pesouketa ki, thezhüko gei nu zezhüketa ki,

¹⁶puo themia nyieto geshüya, mu uko ki kemichie vorkezhü pesi di kedeshüya.

¹⁷süusü puoe themia gei chütuoü kebau chüsetatuoü, tsiu themia gei kemiakokecü dathewatuoü di.

¹⁸puoe Thekre kesou nunu, puo ruopfü sebalieya, mu zhiecha geinu kataketuo nunu puo kerheiro kelalieya.

¹⁹Thezhü geinu kechükenyü rei khashü di miapethaya, tsiu kechü kere pie puo ruko nu khashüya.

²⁰Süla puo kelhou niekhrüda puo nei motaya, tsiu puo me-e kecüca kelhe cü mecütaya.

²¹Puo mo gei puo zhüda ba mota di süu ngulie kenjütaya, sidi puo ru ngu moketuoko chazou ngu partaya.

²²Puo ruopfüe Thekhe kesou penuo votazhie, mu puo kerheiroe kesia se voryakezhako penuo votazhie.

²³Mhanuü puo la dieliemia puo, thedonu chalie puo, nyie puo donu mia puo, themia ki puo la mha puotouu pushülie ütse,

²⁴puoe puo ngumezhieshütuo, di sie, ‘Puo bu Thekre kesou nu leta molieketuo la puo kelaliecie, a rhalieketa puo ngulietewe.

²⁵Puo chü bu puo khriesa ki tuoiliecie; puo bu puo khriesa teikiko nu la votaliecie’ si.

²⁶Süsie puo Ukepenuopfü ki cha, mu puoe puo lielie, puo neisiei di puo mhodzüki vor, mu puo kemiatho la Ukepenuopfüe puo zha chüshü.

²⁷Sidi puoe keli mia kie di sie; ‘A phoumawate, mu mha kemezhüu chükediwate, mu süu a la kemevi ngulie mo.

²⁸Puoe a ruopfü bu Thekhe kesou nu tsuta mo, di a kelalietuo, mu a kelhoue kezieu ngutuo’ si.

²⁹“Harie, Ukepenuopfü mha hako pete rei tsiekenuo themia gei se vorya.

³⁰Thekhe kesou nunu puo ruopfü se la vortatuoü, puo bu kerhei kezieu ngulietuoü di.

³¹He-i Job, meho menuoliecie, a pfhe rünyüliecie; kemekrie balie, siro a diepushütuo.

³²Mhanuü no mhahuo puketuo ba ro, a die kelashücie; pushülie, n bu mezhülieketuo a mengu ba zocü la.

³³Mhanuü simo üliro, a pfhe rünyüliecie; kemekrie balie, mu a mhasi se n pethashütuo.”