Read Angami Naga Job 34 Bible Online

Job 34 - Angami Naga bible

Job 34

¹Süsie Elihue mhapu la di sie:

²“A dieko rünyüliecie, nie mhakesiko, sidi nie nyie kedeipie a tsücie, nie mhasimhale kenyiko.

³u me-e kecüca cü kevi kesuo methalieyakezha tuoi unyie rei die kevikesuo silieyacü la.

⁴Úko mhakemezhüu kedalie khe; úko u thuo u donunu mhakiu vi shikecü silie khe.

⁵Kekreilamonyü Job-e pucü, ‘Ae miatho zo, mu Ukepenuopfüe a mezhüu chüsete,

⁶a mezhü zorei aü kemedamia üte; a kejo jü zorei a kechüpfü chükemenelie mote’ si.

⁷Themia Job kemhiekecü supuo ba ga? Puoe mia puo krenyükecü dzü tuoi krie bata ze!

⁸Supuo nie mhakesuo chüyakezhako ze kepekro, mu kerüzhümia ze tuoya ga?

⁹Kekreilamonyü puoe pucü, ‘Themia puo Ukepenuopfü ngu puo neikecü la, mha kemevi puorei ngulieya mo’ si.

¹⁰“Süla a pfhe rünyüliecie; nie mhacamhala siyakezhako, Ukepenuopfüe kerüzhü mhatho chülie kenjü, mu Kuokejokejüu[61] mhakesuo chülie kenjü zo.

¹¹Kekreilamonyü themia mhatho khekisü chü puoe puo zhakhra chüshütuo, tsiu puo zho kize puoe süu chüpie puo gei shütuo.

¹²Ketho zo, Ukepenuopfüe mha kesuo chülie kenjü, tsiu Kuokejokejüu[62] mhakemezhüu chükediwalie lho zo.

¹³Supuonie kijüu gei kekuo khashü puo tsü, mu supuonie kijüu pedekejü kha puo geishü ga?

¹⁴Mhanuü puoe puo thuo puo ruopfü[63] chüse lata, tsiu puo thuo puo kehau pie lalieta ro,

¹⁵u chü pete kaüjütatuo, mu themia rünyo mevi lata zotuo.

¹⁶“Mhanuü noe kesikele ba üro, hau rünyüliecie; a pukeshüko rünyüliecie.

¹⁷Kemezhüu ngukemecümia bu mhakekhatuo me? No kemiathomia mu kekuomia pejowatuo me?

¹⁸Supuonie kedimia puo ki, ‘No themia kemethuo puo’ mu kezhamia puo ki, ‘No kerüzhümia,’

¹⁹mu kedinuoko gei puo nei si kreiyakemomia, morei kejümia kirei kenyimia khriekreitaya kemomia ki, sikecü pulie vi ta? Uko pete rei puo dzie mhatho phre zocü la.

²⁰Zopuo kinu uko siataya; khisoteiluo ki themia shükenieshüya, sidi siataya, tsiu themia dzie sa mo di kekuomia chüsetaya.

²¹“Puo mhi-e themia zhoko gei bayacü la, mu puo phicha pete ngubaya.

²²Kesuokechümia puo thuo puo kevielieketuo la, kezei morei zeibouikecü puorei ba mo.

²³Kekreilamonyü themia pete bu dienyakecütuoü, Ukepenuopfü mhodzünu voketuo tei rhieshü moluo.

²⁴Puoe ketsokega mo zo di kekuomia biekhrüshütuo, sidi kekreimia bu uko sounu batatuo.

²⁵Sünhie, puo uko mhathoko dze si di, theva zenu bie kethotsüwa, sidi uko bu kata.

²⁶Uko kerüzhü la kekreimia mhodzünu puoe uko vüshü.

²⁷Uko puo siemedzi mo di tsiesietacü la, tsiu puo zhoko puorei sanyü mvüta.

²⁸Süla kejümia meheimelokecü pfhe bu puo ki vote, mu puoe uko mezhüko rünyüliete,

²⁹Puo kemekrie keba ki, supuo puo pejolie ta? Puoe puo zie keviekelie ki, supuonie puo meholie vi ga? Süusü seyie puo morei themia puo shierei,

³⁰puo rhuo kejümia kedi chülieya mo, süusü mia puo bu rei puo biepesuowa kelho la.

³¹“Kekreilamonyü mia puo sie Ukepenuopfü ki, ‘Siazhapie a ketsüu a hieliete, a mha kesuo chü salie lhote;

³²a ngukemo-u se a pethashücie, a mha kesuo chüwa üro, a süu chü salie lhote’ si.

³³No sü meliekewa la, puoe n kele mhiei di chü lashütuo me? U thuo keda morosuo beicü la, süu a gei ba mo; süla no kedipuo si ba shiü pushüliecie.

³⁴Kesikelemia bu a ki pushücie, mu mhakesimia a pfhe rünyükeliemia pushütuo;

³⁵‘Job-e mhasimhale sa mo di die pushü, tsiu puo diekoe thenou mhasi sa mo’ si.

³⁶Job-e kerüzhümia tuoi di die kelakeshü la, puo thela ketso mehoshü üthienyü.

³⁷Miadiezekemo pie puo kephouma sapekraliecü la; puo u donunu puo dzieda ba, tsiu puo die chüpekra pie Ukepenuopfü petsoute” sishü.