Read Angami Naga Job 36 Bible Online

Job 36 - Angami Naga bible

Job 36

¹Elihue diepu la di sie:

²“Puotei huoyo a tsü sashüthie, sitse a thashü nieko kietuo; a Ukepenuopfü sounu mhapuketuo ba saluocü la.

³A kepetse nunu a mhasimhale se vortuo, tsiu a chükeshüu miatho ükecü se putuo.

⁴A dieko kekrü moto zocü la; mhasimhale vitseikecüu n ze ba zo.

⁵“Harie, Ukepenuopfüe zha, tsiu miapuorei rütseya mo; puo mhasimhale mu kekuo nu rei zha.

⁶Puoe kerüzhümia bu rhei baya mo, derei kemezhiekecümia mezhüu khashü tsüya.

⁷Puo kemiathomia geinu puo mhi kereisetaya mo; derei puo uko bu kedimia ze di kechachie kediba gei baya, tsiu uko chüpezhashüya.

⁸Tsiu mhanuü uko bu phikha nunu tsiu kemezhiekecü ro nunu uko phase ba ro,

⁹puo uko mhatho, tsiu uko kejokemou kedipfü kedithede chü shicü thapie uko kieshüya.

¹⁰Puo uko nyieto shükerei pie kepethatsa shülieya, sidi uko bu mha kesuo kechü nunu rüreilienu di diekhashüya.

¹¹Mhanuü uko puo pfhe zelie mu puo liechülie liro, uko mhanyi di uko teisozhako tseilietuo, tsiu kenei nunu uko teicieko tseilietuo.

¹²Derei mhanuü uko puo pfhe ze mo liro, ukoe zhiecha geinu kaüjütatuo, tsiu mhasimhale jü di siatatuo.

¹³“Pelekemomia noue noupfhü kengu sebaya, puo uko phakeshü ki zorei uko kekhruohi chaya mo.

¹⁴Uko khriesa baluokecü nu siataya, tsiu uko kelhoue thenga nunu thela chütaya.[65]

¹⁵Puoe kemezhie kebako kemezhiekeba nunu uko kelashüya, tsiu mia uko pesekecü ki uko nyie shükereishüya.

¹⁶Puoe no lhou kemezhie keba nunu chü kedi se vo thechü kemeya puo nu shütuo, sünu kerübekecü ba mo; tsiu mha pie n mizhü gei keba pete mhakesuo rübei batuo.

¹⁷“Derei kerüzhümia pejokecü thuo n gei tshute, pejotuo mu kethocau thuo n telietuo.

¹⁸Noupfhünouyie bu n teshü se vo miakrenyü chüta rei si lho mu menuoliecie; tsiu n rhalietuoü mhakekra khakeshüu bu n chükereiwa hiecie.

¹⁹Kemezhiekecü nunu n sebalienu kekhruohi cha, morei n kekuo pete khashünu chatuo me?

²⁰Teizei mengu hie, themia u tha nunu dathekewa ki.

²¹Menuoliecie! Mha kesuo kechü nu rürei vota hiecie; hau la no kemezhiekecü ki rei hau kedaliete.

²²Harie, Ukepenuopfüe puo kekuo geinu rükrie khotaya; supuonie puo mhie di mia pethashü ga?

²³Supuonie puo chau pushülie vi ta, morei supuo sie, ‘No mhachü kekrüwate’ isilie ta?

²⁴“Puo mhatho chü pezhapecha shüketuo, rükraliecie, themia süu se keliya.

²⁵Mia pete süu mehoya; themia kepetse nunu süu ngulie vi.

²⁶Harie, Ukepenuopfüe zha; mu we puo si tso mo; puo teicie kichiepuo shikecü pfhü se parlie kenjü.

²⁷Kekreilamonyü puoe teirü pepokeshü chüsetaya, süko kekhu kemhiei di tei perüshüya.

²⁸Süusü kimhoukoe peposhüya, sidi themia gei rü kemerie chütsurya.

²⁹Mia puoe kimhou shüketuo, morei teikesepfhe kebachüu silie vi me?

³⁰Harie, puo puo kezie kelhapie sügei shüya, tsiu dzükezha thotsü whepfü baya.

³¹Hako se di puoe mia dienyakecüyacü la; puoe kecüca kekra khashüya.

³²Puoe puo dzie pie teikemelau whepie ba; tsiu kimhou puo donu shü kevor bu zieshü hienu di diekhashüya.

³³Mhapfhe puo dze thashüya; puoe puo ro mu noupfhü se di kephouma perhieya.