Read Angami Naga Job 37 Bible Online

Job 37 - Angami Naga bible

Job 37

¹“Haha la rei a meloue pebate, tsiu puo tha nu balie mote.

²Puo pfhephra teikese chükecü, tsiu puo tie nunu kepar pfhe rünyü menuolie.

³Puoe teikhro pete nu süu bu voya, tsiu puo teimelakeshüu bu kijü vala ketso voya.

⁴Süu sie puo pfheu mehoshü; puo kekuo nunu puo pfhe teikese pfhe chüshü; tsiu puo pfhe sikeshü ki puoe teikemelau khashü motaya mo.

⁵Ukepenuopfüe puo pfhe se teise kemerie chüshü; puo we si huliekelho mhakezhazha chüshüya.

⁶Kekreilamonyü puoe pekrie ki, ‘Te kijü tsucie’ sishüya; tsiu teirü ki, ‘Kekuou chülie’ siya.

⁷Puoe themia pete dzie khashüya, themia pete bu puo mhatho silieketuo la.

⁸Sitse nhachüko u bou nu votaya, sidi u bou nu bataya.

⁹Pekhrotsa nu khriewhi vorya; siro pesotsa nu kemekou vorya.

¹⁰Ukepenuopfü hakeshü geinu thezei khashüya, tsiu dzükezhau pekrie mevi mhaitaya.

¹¹Puoe dzü pie kimhou keshüu petseshüya; kimhoukoe teikemela pfü kezashüya.

¹²Ukoe puo chathau nunu whi pa mu le baya; süusü kijüu gei puo die khakeshüko pete bu chü tseilieketuo la.

¹³Chükemezhükecü la rei, morei puo kijüu la rei, morei ngukemezhie la rei, puoe süu bu vorkelie chüshüya.

¹⁴“He-i Job, hau rünyüshücie, thalie di le menuoshücie.

¹⁵Noe Ukepenuopfü kimhie di puo die khapie uko gei shü shicü, tsiu puo kimhou kezieu bu zieshü shiü si ba mo?

¹⁶No kimhou mejü tou sekeba, puo mhasimhale tsei di mhatho u ngo chükeshüko siba mo?

¹⁷Puoe pekhrotsa teikhrieu bu kijüu bie kemekrie keshü ki, n pfhenei leme-i balieya die?

¹⁸No puo kemhie di teiu shülhapie khrüva the pezhakelie mhiei shülie vi me?

¹⁹Hie bu kedipuo pie puo ki putuo shiü se hie pethashücie; kezeiu la hie mha pulie kenjüte.

²⁰A bu puketuou pie puo ki pushütuo me? Mhanuü mia puoe diepushü liro, puo mezoulieta mecie zo.

²¹Tsie themia bu teigei ziekezha kemevau ngulieya mo, derei teikhrieu vorya, sidi süu chükemesashüya.

²²Pesotsanu teila keviu vorya, Ukepenuopfüe kuo kemeriechü ba.

²³Kuokejokejüu[66] we puo ngulie kenjü puo kekuoe zha mu mezhü, tsiu miathothorcü la mia pechüpenyüya mo.

²⁴Süla themiae puo khrü preiya; puoe themia u thuo u üse mhasi üyakezhamia üse mhaüya mo.”