Read Angami Naga Job 38 Bible Online

Job 38 - Angami Naga bible

Job 38

¹Sitse Ukepenuopfüe khriewhi nunu Job die kela di sie:

²“Mhasimhale sa mo di die üse kepethadie biepesuoyakezha themia hau supuo ga?

³No tsie thepfumia mhiei di n chiephaliecie, a mha n ketsotuo, mu no a die kelashücie.

⁴“A kijüu mvüdzeko dzekeshü ki no kirapuo tuo ga? No mhasimhale baü liro, a ki pushücie.

⁵Supuo süu mejüshü shi no siba me? Morei supuonie süu ro-u teshüshü ga?

⁶Puo mvüdzeko kirapuonu teshü seba, morei supuonie süu ke nu tsieu mvü dzeshü ga?

⁷Kikecüki puo khise themvüko keze kelishü, mu Ukepenuopfü nuonuoko pete u nei di shieshü ga?

⁸“Morei supuonie u zuo va nunu kepar ki, kikhako pie dzükezha khawa ga?

⁹A kimhou pie süu pfhedzie chükeshü ki, tsiu zeibouikecü pie süu kezü pfhe chükeshü ki,

¹⁰Mu süu rie thelau rhielie, sidi puo keya tsiu kikha chüshülie,

¹¹sidi sie, ‘No hanu ketso vorlie vi, derei petse sa philie lho; mu hakinu n bu kemiako ketuo chako khalietatuo,’ sishü die?

¹²“N teisozhako sedekelie nhie nu no khiseu ki, die khashü di khienhieluou bu puo tha sikelie chüshü me?

¹³Sidi süu bu kijü thelako teshü se balienu, tsiu kerüzhüko chüwa nu n die khashü me?

¹⁴Süu mohor khro rügau tuoi rüdite; tsiu sükoe pfhe thikewa[67] tuoite.

¹⁵Kerüzhüko kinu uko kezie keviewate, tsiu uko yha kerükriekelieu bietshewatuo.

¹⁶“No dzükezha dzüluo nu le morei no kesou nu tuo mha meho vo me?

¹⁷Kesia kharuko khrüshü n tsü, morei no kesia khrü kikha nguwate me?

¹⁸No kijü puo zha kedithede shikecü siliete me? Mhanuü no hako pete siba ro pushüthie.

¹⁹“Kezie bayakezha nu kevo chau kirapuo ba, mu kezei chü kirapuo ba ga?

²⁰No süu se puo tierie nu volie vi mo, tsiu no süu kinu kevo chau n bu sicü mese üba me?

²¹No süu siba, kekreilamonyü süteiki n penuoliete mu n zhako kra phite.

²²“No pekrie kengupiekeba chü nu lewa, morei prü kengupiekeba chüu nguwate me?

²³Süusü a kemezhiekecü tei nhie la, chüterhü kechü nhie la khapie ba.

²⁴Kezieu kezashüyakezha chüu kirapuo ba ga? Morei kijüu gei niathutsa teikhrieu kirapuonu kezashü ga?

²⁵“Supuonie teirü keker chau dushü, tsiu teikese ki methie keker chau chüshü ga?

²⁶Süu bu kijüu gei themia tuo kemora rü tsurlie; rayha nu themia lhoukemo ra shü.

²⁷Khakewa mu raketa kijü bu u kelhuo chülie, tsiu kijüzieu gei nha kemene bu theparlie.

²⁸“Teirüe puo puo ba me? Morei supuonie thezei potata bayakecüko penuoshü ga?

²⁹Supuo va nunu pekrie-e par, tsiu supuonie teigei mhoutsa krapouicüko chüshü ga?

³⁰Dzüko meteipie ketsie tuoite, tsiu dzükesou-u pekrie mevite.

³¹“No Tsüba mhahükeba phalie, morei Zuthiekroko kengukeba phreishülie vi me?

³²No puotei ki themvükro-u separlie, morei no Rhupieko puo nuonuoko sa di chathalie vi me?

³³No teiko zho dze silie vi me? No kijüu nunu uko kekhaketuo parlie vi me?

³⁴“No n pfhe phrapie kimhouko ki shü di, dzüdi bu n whepfülienulie vi me?

³⁵No teikemela bu volienu ketseshülie vi me? Tsiu n ki, ‘Hieko hakiha bawe’ icü pulie vi me?

³⁶Supuonie mhasi pie n nou shüshü, morei kesikele pie n melou nu shüshü ga?

³⁷Supuonie mhasi se kimhouko phrülie ta? Morei supuonie teiko gei dzüpouko kekha seba di,

³⁸nyophe bu meteita, tsiu niekroko bu thie kemapfü bataya me?

³⁹“No chüte pfhülie vi me, morei losha nuonuoko valuo chülie vi me?

⁴⁰Ukoe uko bou nu zhütsukecü ki, morei uko rüshübou pfhekezhü ki puo chüte pfhü voya me?

⁴¹Supuonie shüzhae puo nuonuoko la, kecüca mengu di Ukepenuopfü ki cha, tsiu kecüca pfhü rühouketuo ki kecüca pie puo tsüshüya ga?