Read Angami Naga Job 39 Bible Online

Job 39 - Angami Naga bible

Job 39

¹“Kikecükipuo tsiekrie gei theloue penuoshüya shi no siba mo? No tekhra krüpfü penuokecü tei lebaya me?

²No uko thekhrü kidepuo seya shikecü, tsiu kicükipuo uko penuotuo shicü tei siya me?

³Ukoe tenheke di uko nuonuo zelieya, tsiu u nuonuoyie penuoshüya.

⁴Uko nuonuoko metei sielieya, uko phouyo nunu zha sielieya, uko tuo prataya, tsiu la uko ki vorya mo.

⁵“Supuonie gada bu puo medochü votatuoü ketseshü ga? Supuonie gada pha phreishü di,

⁶puo bu ketsako pie puo ki chükeshü nu, tsiu mhalhouyakemo pie puo kebachü chükeshüu nu vota ga?

⁷Puoe bouübikeba nadi ngu puo neiya mo, morei puo keseu shiekeshü pfhe rei rünyüya mo.

⁸Kijüthou gei nhae puo kecüca zo, tsiu puoe nha kepejo neiünei pete pfhütuoya.

⁹“Nhawi-u n lie chü nyü tuo me? Theva gei n rikhou ki balietuo me?

¹⁰No lie ciekecü ki nhawi kekhe ro-u pie puo phalie vi me? Morei puoe n siemedzi di kijü thezhau cieshütuo me?

¹¹Puoe kuo sekecü la no puo pele, morei n mhatho khapie puo tsülie vi me?

¹²Puoe tuo la vor di telha se vo shienu kengushüketuo no puo peleya me?

¹³“Ostrik-e puoshü kelha pezha philie zorei puoshü, mu puo mie-e kekhrie rapfü mhie me?

¹⁴Kekreilamonyü puo pedzü pie kijü shüwaya, sidi nyophe bu süko biepeleya,

¹⁵Thephi bu süko kedewalie kevi, tsiu nhachü bu süko bietshewalie kevi rükra mocü la.

¹⁶Hapfüe puo nuo kecüko gei puo zhosuo phi, süko pie puo viekemo mhie zo; puo mhatho thedo chüta rei, puoe preibaya mo,

¹⁷Ukepenuopfüe puo bu mhasi rükrakemo chüwacü la, tsiu kesikele khapie puo tsü mote.

¹⁸Puo prou rükrie kesie ki, puo gura mu puo geiketuou kretaya.

¹⁹“No kekuo pie gura tsüshü me? No kekuo pie puo vo wheshü me?

²⁰No puo chüpie puo bu kutuoi proukelie chüshü me? Puo nhyüki nu pfheu kemerie zo.

²¹Puoe razha nu phitho thaya, tsiu puo kekuo nunu puo neithaya; puo rünyiekesemia ze kesetuoü voya.

²²Puo kemichie kreya, tsiu michietaya mo; morei puoe zhiechau se nunu rüwitaya mo.

²³Theütsie pruo puo petsou phir rüngou phriephriekecü mu pezhüu.

²⁴Puoe kemerie mu puo noumeyie phi di kijüu mezulie; puoe ketsü kekhou pfheu si di thalie kenjü.

²⁵Ketsüu khoushü tse, puoe sie, ‘Yha!’ ishü. Puoe kepetse nunu terhü nu krütau teikese chü di shiekeshü pfhe thengulieya.

²⁶“Rümou n mhasi geinu prou, siro puoshü kelhapie pekhrotsa vatuoya me?

²⁷No die khakeshü ze di tsüüra pruo kho kerükrie geinu puo kru chülieya me?

²⁸Puoe tsiekrie gei, tsiekrie khiehe geinu puo ki chü di baya.

²⁹Sünu puoe puo rate pfhüya, tsiu puo mhinie-e kepetsetsa meho baya.

³⁰Puo nuonuoko rei thezie mete cüya; tsiu kesiamo kezhüra puo rei süra tuoya.”