Read Angami Naga Job 40 Bible Online

Job 40 - Angami Naga bible

Job 40

¹Süsie Jihovae Job ki diepu di sie:

²“Mia kejokepfhü pie Kuokejokejüu[68] ze keperhielie vi me? Ukepenuopfü ze keprülikebau bu süu kelashücie.”

³Süsie Job-e Jihova die kela di sie,

⁴“Harie, ae kemethuo zo; a kedipuo pie n die kela ta? A a dzie pie a tie kegulietuo.

⁵A va puo die pushüte, derei a die süu kelashülie lho; vakenie rei, derei a pu salie lhote.”

⁶Sitse Jihova khriewhi geinu Job die kela di sie:

⁷“Thepfumia tuoi di n chiephalie; a n ki mhaketsotuo, mu a ki pushülie.

⁸No a pie kejo nu khashü tuo me? Mezhülietuoü di no a pejo tieya me?

⁹No Ukepenuopfü bou kemhie, tsiu puo mhie di teikese pfhe chüshülie vi me?

¹⁰“Kekuo tsiu mesümedekecüu se n ketsoliecie; thetshetherhu tsiu zivi chü dzieliecie.

¹¹N noupfhü kereu kelhou pie chazoushüwalie; tsiu kemiakokezha kehoupuorei mehoshü di puo chükerünuowalie.

¹²Kemiakokezha kehoupuorei mehoshü di, puo pie kerünuo kerwalie; tsiu kerüzhümia u kethachüu nunu kedewalie,

¹³Süko pete pie nyophe nu keviewalie, tsiu kepekhrera nu uko dzie phawaliecie.

¹⁴Sitse n dzie n zatsa thuo kuokelie kha n tsülie viücü a n ki zhapu chüshütuo.

¹⁵“Harie, Krediepfü mehoshü phi, a n chükeshü tuoi süu rei chüshü, puoe thudo tuoi nha cüya.

¹⁶Harie, puo kekuoe puo chieca nu ba, tsiu puo kekuoe puo vadi gei puo zhüda nu ba.

¹⁷Puoe sedarpfü tuoi puo mie chü kemeteilie; puodo gei puo zhüdako chü kesepie ba.

¹⁸Puo rue merenyi kemetei tuoi metei; puo phikoe thegi co kemhie zo.

¹⁹“Ukepenuopfü mhathotsatie puoe kemeyietho-u zo; puo chükeshüu rübei puo ze puo zhiechau penuo vorlie kevi zo.

²⁰Nhachüko rüzhü bayakezha kijüthoukoe kecüca khashü puo tsüyacü la.

²¹Puoe lotus bo khro, tekhriebo khrükhro, tsiu dzüthoudzühie nu lha khro rüshü zhüya.

²²Kekreilamonyü puoe Lotusbo khronu puo soulieya; kerü nu sopfüciekhrie puo houpfü baya.

²³Harie, puoe michietaya mo, Jordan rü kru sier puo tie tso zhüta zorei, puoe thepfubaya zo.

²⁴Miapuo nie cawi[69] pie puo telie vi me? Morei kebie pie puo nhyüca nu gelie vi me?