Read Angami Naga Job 41 Bible Online

Job 41 - Angami Naga bible

Job 41

¹No khuoshüwi se khuokerie teshü separlie morei no petekeshü ro-u pie puo meü teshülie vi me?

²No kero pie puo nyhüca dulie, morei zohu pie puo meco gephalie vi me?

³Puo n ki mhakekra se puo mezhiemelo me? Puo n ki die kemene putuo me?

⁴Puo üse kechachie n kituo chütuoü n ze kepfhekhotuo me?

⁵No pera ze rüzhükecü tuoi, puo ze rüzhü morei no puotie pie n nuopfüko tsütuo me?

⁶Lhithomiako puo geinu upra ushü pfhütuo me? Uko puo pie lhithomiako ze kezatuo me?

⁷No thegi hau pie puo zhü ketshu chüshü, morei khuo keze ngou pie puo tsü zechieshülie vi me?

⁸N dzie pie puo gei shüshücie; rüyachüu rükrashücie, no sükemhie chü sa hie.

⁹Harie, themia kemerüue kemethuo zo; mia puo ngukeshü zorei tetsuta lhoü me?

¹⁰Miapuorei puo zho suo di puo meshükelie pfü mo. Siliro supuonie a mhodzü thalie vi ga?

¹¹A bu puo sou lashü puo tsü zhü üdi supuonie pie a tsüshü ga? Teikhro kekuo pete mhakehoupuo rei a vie phre zo.

¹²Puo phi puo dzie, morei puo kekuo, morei puorhi kezivi dze a pu motalie lho.

¹³Supuonie puo pfhe peso-u lhe kelhouwalie vi ga? Supuonie u tie kekha kenie se puo ki vorlie vi ga?

¹⁴Supuonie puo kelhako khrüshülie vi ga? Puo hue kemeriechü houpfüba zo.

¹⁵Puo chie-e pezhü lakecü pie chü, zasi pie vükewa kemhie khawate.

¹⁶Ukoe kegetipfü ba, süla teikhrie süko donu lerlie kenjü.

¹⁷Uko huohuo ze ketoukerepfü ba, uko kekutsapfü di chükhowalie kenjü.

¹⁸Puo rüthiekeshü ki kezie parya, siro puo mhi-e khrü mhi kemhie zo.

¹⁹Puo tie nunu mitu, tsiu miü pro parya.

²⁰Puo nyhüca nu kekhu parya, süu gali mekhro kezha mu ronyho thekeshü tuoi.

²¹Puo thesü mizhü mhe petulieya, tsiu miü puo me nunu parya.

²²Kekuo pie puo phapfü ba, tsiu puo mhodzünu kemichieu nashü tuoya.

²³Puo chüe huoniehuo ze kemapfü ba; puo gei rüzei tsaipfü di kenielie kenjü zo.

²⁴Puo meloue khrüpie ketsie kemhie zo, metei pie mhakegetsie pekhro-u mhie zo.

²⁵Puoe sier thakelie ki kekuomiako michietaya; ukoe michieketa la thopfü bataya.

²⁶Zhiecha pie puo rütha zorei, süu se thalie kenjütaya, morei rüngou, theütsie morei pezhü zorei.

²⁷Puo mhodzüki thegi-e rügu kemhie zo, tsiu merenyi-e seibvü kemhie zo.

²⁸Theütsie puo whuo petalie kenjü; tsiedeiro-e pie cienheciera chüwaya.

²⁹Theütsie-e cienheciera tuoitaya; puo rüngou kepreikeshü kretaya.

³⁰Puo noutsa-e ketsie puoü kevi mhie zo; puoe mhamethekecü kepfüpie nyoba nu shüya.

³¹Puoe mha kesouu chüpie puo bu gali tuoi thekerüdalieya. Puoe dzükezha chüpie tier gali puo tuoi shüte.

³²Puoe ziekruoikecü khapie puo sietsa shü; mia puoe kesouu üse tsütha krapouikecü letalie vi.

³³Kijü gei puo mhiekecü ba mo, puo chüpie kemichie keprei jüte.

³⁴Puoe mha kerükrie pete nguya; puoe kemiakokecü nuonuo pete mho kediuta zo” si.