Read Angami Naga Job 42 Bible Online

Job 42 - Angami Naga bible

Job 42

¹Sitse Job-e Jihova die kela di sie,

²“No mha kehoupuorei chülie kevi a si ba, tsiu a kinu nu n mharhü puorei kha se balie kenjü.

³Kesikele jü di kepetha die kevie se ketuou supuo ga? Süla ae puocapuola sikemo-u pu phrashüwate, mha süko a ngothor zo, süla a si mo zo.

⁴‘Rünyüshücie, sitse a diepushütuo; a n ki mha ketsotuo, mu no thapie a kieshücie’

⁵A a nyie nu n dze sishü, derei tsie a mhi pie ngu bate;

⁶Süla a thuo a mecübate, sidi nyophe tsiu mige nunu a nou kedizhie” si.

⁷Jihova die hako pie Job ki pukewa sie, Jihovae Elifaz Temat-u ki sie, “A n gei tsiu n zenie gei a nou meyie bate; kekreilamonyü a kituou Job sekeba mhie nieko mha puotou pushü kemo la.

⁸Süla nieko tsie thudo thenie tsiu mvüdo thenie selie di a kituou Job ki vocie, sidi nie la mha thepie ruosuo puo chüshülie; sitse a kituou Job-e nieko la kecha chüshütuo; kekreilamonyü a puo kecha lielietuo, nie kemelo kize a bu nieko gei chüwa molieketuo la; nieko a kituou Job sekeba mhie di mha puotouu pushülie kemo la” sishü.

⁹Süla Elifaz Temat-e, Bildad Shuhit-u mu Zofar Namat-u ki vo di, Jihova uko bu chünu keshü mhiei chülie; tsiu Jihovae Job kecha rünyülie.

¹⁰Puoe puo zeko la kecha chüshükecü ki, Jihovae Job pha phreishü mu jashü puo tsü, siro Jihova thiedzü ketuo de kenie pie puo tsü.

¹¹Sitse puo siezedzürie peteko, tsiu puo üpfünuo peteko, tsiu thiedzü puo khriethokhriechümia peteko puo ki vor, sidi puo kinu mhacümhakrie, tsiu uko ngukemezhie tha puo kie, mu Jihova se puo gei kevor mhakere peteko la puo nou thupeluoshü; tsiu uko mia puopuokecü shükeiraka[70] tsiu suna pienyie pie puo tsü phre.

¹²Sidi Jihovae kerieki rei kenuotsa japie Job tsü krashü, sidi puo bu tekuo nyie keredia, ut nyie sorou, mhathothu nyie puo, tsiu gada krü nyie puo nyilie.

¹³Süsie rei puo nuonuo thepfumia thenie tsiu thenumia se nyilie.

¹⁴Tsiu puoe nuoriepfü za thopie Jemima chü, keniepfü za thopie Kezia chü, tsiu sepfü za thopie Keren-hapuk chü.

¹⁵Siro kijü pete nu Job nuonuoko de kezivi ngulie mo, tsiu uko puoe uko prünuoko donu uko shiephroshü.

¹⁶Hausie Job-e cie krie puo di hiedia lhoulie, sidi puo nuonuo tsiu puo tsunuo phou dia rei ngu

¹⁷Süsie Job-e tsatota, tsiu teisozha kekra nguwa di sia.