Read Angami Naga Job 5 Bible Online

Job 5 - Angami Naga bible

Job 5

¹“Huomia n die kelashülie kevi ba üro, tsie kieliecie. Kemesako donu suomia ki no votieya ga?

²Ketho zo, u kebvükecüe mhasikemomia biekhriwaya, tsiu miangu urokecüe mhalekemomia dukhriwaya.

³Ae kenyamia puo mie krekekie ngu, sirei puo kiu rüsepfü mhai lata.

⁴Puo nuonuokoe khrukhrekecü nunu pecietuote, tsiu ukoe kharu nunu uko gewate, mu uko shüphrakelie puorei tuo mo.

⁵Merüketuomia bu puo lieyieu cülieya, mu uko zohu bou nunu zorei chüsepartaya, mu terhüketuomia puo kinyi pfhü meyhumezhietuoya.

⁶Nyophe geinu kemezhiekecü parya mo, morei kijüu geinu kebvükecü parya mo.

⁷derei miüe pruo pekhra voyakezha tuoi, themia penuo pie kebvükecü nu shüwate.

⁸“Derei a we Ukepenuopfü pfhü votuo, tsiu a dze pie Ukepenuopfü pelewatuo.

⁹Puoe mhakezha phi, tsiu pfhü hulie kelho chüshü, mha u ngo sekecü phrü hulie kelho chüshü.

¹⁰Puoe tei perüpie kijü gei shü mu dzü khapie lieko nu shüya.

¹¹Puoe themia kerünuomia sekho kerükrie gei shüshü, mu thekrüchü kebamia piekho kemichie kejüra shüya.

¹²Puoe u dokeviko bu mhatho nu u nouluoliekemo chüwa, süla uko dzie-e mhachü khrielie mote.

¹³Puoe u dokeviko mhatho u telie, tsiu themia kedovikecümia mharhü bu puo thela chü mhaitaya.

¹⁴Uko teisogei zorei kezei ze keseya, tsiu khinhieluo ki zorei theva gei tuoi mha kesekevuo tuoya.

¹⁵Derei puoe u me nu ketuo zhiechau nunu mhakejümia kelashüya, tsiu kekuomia dzie nunu uko kelalieya.

¹⁶Süla kejümia puo kemerü ba, tsiu mha kesuokechü puo tie khawaya.

¹⁷“Harie, Ukepenuopfü puo chükemezhükeshüu puo nei baya; süla Kuokejokejüu[12] n pechü di n pethakecü rütseta hiecie.

¹⁸Kekreilamonyü puoe thepfü khashüya, derei süu pha lashüya; puo bie kerüzashüya, mu puo dzie süu chü kemeneshüya.

¹⁹Puoe kemezhiekecü sorou nu n kelashütuo; va thenieu va mha kesuo puorei n bielie lho.

²⁰Pekriekecü ki rei puoe kesia nunu n kelashütuo, mu terhü nu rei zhiecha kekuou nunu n kelashütuo.

²¹Themia tie kesuo nunu n kevielietuo; mu süu vorkecü kirei kepekau preilie lho.

²²Kepeka mu pekriekecü teiki noe nyü batatuo, mu noe kijü nhachüko rei preilie lho.

²³Kekreilamonyü noe lie nu ketsieko ze khrietho, mu khunuoko n ze kezevi batatuo.

²⁴Noe n pfhekiu khrukhrekecü nu baücü silietuo, mu no vor n kebachü mehotuo mu mhapuorei jütalie lho.

²⁵N se n yie kralie ketuo noe silietuo; tsiu n geinu keparko kijüu gei nha tuoiketuo situo.

²⁶Telha puotei ki mekelie tuoi, no n tsa zenu n mekhru nu votuo.

²⁷Harie, hau hie pfhü mehowate, mu süu sitou zo. Rünyüliecie, sidi no süu n dzevi la ücü siliecie” si.