Read Angami Naga Job 6 Bible Online

Job 6 - Angami Naga bible

Job 6

¹Sitse Job-e sie:

²“He-i, a noukesuoko mejü tseishü tsiu a mezhieko pie roshükhou nu shüshü ücüwe!

³Sükoe dzükezha nu theshünyoko kirei mesikuota zotuocü la; süla a die rete.

⁴Kekreilamonyü Kuokejokejüu[13] theütsieko a geituote; sünu thereiu a ruopfüe krieliete; Ukepenuopfü puo tha chülie di a petsou bate.

⁵Nha gadapfü puo nha keba ki ruobaya me? Morei thudo puo cha khieki nu mo thaya me?

⁶Mha momokecüu metsie sa mo di cülie vi me? Morei thevüdzü kekrau puo kelhe baya me?

⁷A me kelhe-e süko bie mvüte; sükoe a neikemo kecüca kropuo mhiete.

⁸“He-i a bu a kechau ngulieü thienyü, tsiu Ukepenuopfü a menguu chüpie a tsü üthienyü!

⁹Ukepenuopfü bu puo medo di a pekawa üthienyü; puo bu puo dzie yhashü di a dathewaü thienyü.

¹⁰Sitse a thenouluo bata tieciü; a thenoukesuo geinu a nou a nei bata nyü zolie, kekreilamonyü a Kemesau dieko melie mo zo.

¹¹A kekuo kedipuo ba üdi, a pfhe balie vituo ga? Tsiu a thela kikecüpuo di, a bu rhei sa batuoü ba ga?

¹²A kekuo ketsie kekuo mhie me? Morei a chüe merenyi kemhie me?

¹³Ketho nu kekhruohi a nou tuo mote, tsiu mhasi a geinu whuowate.

¹⁴“Themia puo zemia puo ngumezhiekeshü nunu u kethelieketamia Kuokejokejüu[14] khawataya.

¹⁵A siezedzüriekoe rücürünuo tuoi a se kedowate, tsiu rücü rünuo dzü tuoi uko krute.

¹⁶Pekrie la süko teimekieketa tuoi, mu sünu pekrie zeketsur tuoi,

¹⁷Teile kepar ki, uko zetaya, süu lepar ro, uko tha nunu jütaya.

¹⁸Uko kevochako bie kediwate, uko mharapuorei voya mo, uko jütaya.

¹⁹Tema rüve kro-u meho sie, mu Sheba rüvemiakoe mha merüba.

²⁰Uko kemerüu la uko ziekejü chüta; uko sünu vor di mengaliete.

²¹Nieko kemethuo zo; nieko a tetsukezhü ngu di michie bate.

²²Ae sie, ‘Mha methuo pie a tsücie’ si me? Morei, ‘Nie kinyi nunu a la theso khashücie’ si me?

²³Morei, ‘Ngumvümia dzie nunu a kelaliecie’ si me? Morei ‘A kepesemia dzie nunu a rhaliecie’ si me?

²⁴“A pethashücie, sitse a kemekrie batatuo; tsiu a kirapuo kekrüte shi a bu siliecie.

²⁵Die kemezhüko puo kekuo re zolie! Derei nieko pethakecü, kedipuo pie a pethashü ga?

²⁶Niekoe die pethalie vi ücü leya me? Themia u nyietakecü, teikhrie kemhietakecü puo üdi.

²⁷Nieko u puonuo kejüko la rei dape chüyie, tsiu nieko nie zeko la kelhithaya.

²⁸“Derei tsie, nie nei di a mehoshücie, a nie mhodzünu medalie lho zocü la.

²⁹Rüreilie, a chaya, kekrüwa hiecie. Tsie rürei vorlie, a kemezhüu dojü thate ho.

³⁰A meü nu kekrükecü ba me? A me-e kepeka silie lhoü me?