Read Angami Naga Job 7 Bible Online

Job 7 - Angami Naga bible

Job 7

¹“Kijü gei themia u mhatho re, mu puo teisozhako zorei zhakhra zhakhrümia teisozha mhie zo moü me?

²Miadiemia teisü mengu kelhoyakezha tuoi, tsiu zhakhra zhakhrümia u mhatho zhakhra mehoterü tuoyakezha tuoi;

³sütuoi thekhrü kemethuokecüko pie a ya chüwate, tsiu u nyie phikecü teizeizhako a tsüwate.

⁴A ke zhülie tse, a sie, ‘A kicükipuo sielieta?’ Derei teizeizhau cha, mu teisotie vorlie kemochie meyhumezhiekecü thuo a tshupfü zhüya.

⁵A chüe zochüko mu nyophe thuo zepfü bate; a zhü rükote sidi kerütse chüte.

⁶A teisozhako pfhekedomia jürü ki rei ta vikuote, tsiu kemerü jü di pevowate.[15]

⁷“A kerheiro ha thesü puo zoücü rükrashücie; a mhi mha keviu ngu salie lhoketa rei.

⁸Themhi a nguwaketako a ngu salie lhote; nieko mhi a meho keba nu a ba motatuo.

⁹Kimhou jüta di ngu motayakezha tuoi, sütuoi Sheol nu tsuketako la parlie lho.

¹⁰Uko tuo u kinu la vorlie lho, siro puo kebachüu rei si salie lhote.

¹¹“Süla a a tie kethewalie lho; a a ruopfü kemezhiekecü toupfü di dieputuo; a ruopfü kemezhiekecü nu a panyatuo.

¹²A üse Dzükezha morei Dragon üdi no a pfheba zo me?

¹³Ae sie, ‘A zhüe a nou thupeluolietuo, a yakoue a mezhieko chü kerüüshütuo’ idi kepu ki,

¹⁴noe a mhogeinu a kechü, mu ziemhoko pie a kede;

¹⁵süla ae kerüchakhrikecü keda, mu themo hau ki rei kesia a neikuota.

¹⁶A kelhou mecüte; a rhei sei balie lho. A bu a rübei tacie, a teisozhakoe thesü puo zocü la.

¹⁷Themia ha kedipuo üdi no puo chü pezhashü ga? Mu no kiüdi n nou pie puo gei shüya ga?

¹⁸Kiüdi teisoduü puo meho mu tsiekenuo puo dojü mu?

¹⁹Puotei keduo yopuorei no a mehokemo chülie lho me? A bu a rübei di a mhitsie mezulie me?

²⁰Mhanuü a phoumawa ro, no themia mehoyakezhau, a n gei kedipuo chüwata ga? Kiüdi no a petsou di a rü bata ga? Kiüdi a pie n pie puo chübata ga?

²¹Kiüdi no a kephouma vawa, mu a kesuokechüko chü seta mo ga? Kekreilamonyü a tsie nyophe nu zhütatuo; no a pfhütuo, derei a ba motatuo.”