Read Angami Naga Job 8 Bible Online

Job 8 - Angami Naga bible

Job 8

¹Sitse Shuhit-u Bildad puo die kela di sie:

²“Kichiepuo no hako pu zo batieya mu n tie nu dieko bu teikhrie khriedi kemhie batieya me?

³Ukepenuopfüe kemezhüu biekediwayaü me? Morei Kuokejokejüu[16] kedietho-u bie pesuowayaü me?

⁴Mhanuü n nuonuoko puo gei kejo chüwa ro, mu puoe uko khapie uko kephouma kekuo nu shüwa ro.

⁵Mhanuü no thethochü di Ukepenuopfü pfhülie, sidi Kuokejokejüu[17] ki n mezhiemelolie,

⁶mhanuü noe mesa mu mezhü zo liro puo n la sier thalie zotuo, sidi n khapie no thakesü chüu nu shü zotuo.

⁷N kelhou sede ki we tsa zo shierei, kenuotsa we kra sekelie mese zo.

⁸“A n ki chaya, thiedzü keriemia dze ketsoliecie, sidi u puonuoko pfhükelieu rükrashücie;

⁹kekreilamonyü we ndumia zo, tsiu mhapuorei si moto zo, kijü nu u kelhouzhae mhakhrü puo mhie zocü la.

¹⁰Uko n pethashü; tsiu n ki pushülie lhoü me? Mu uko kesikele nunu die puphrashülie lhoü me?

¹¹“Dzüthou ba moro papiruspfü lhoulieya me? Dzü sa mo di nha lhoulie vi me?

¹²Puoe pou ba luokecü nu, tsiu dathewa mo luokecü nu, süu nha kekrei mhodzü rüwitaya.

¹³Ukepenuopfü rükra moketa pete chae sükemhie zo; tsiu Ukepenuopfü pelekemomia kemerüu jütatuo.

¹⁴Puo kemerüu dathewatuo; tsiu puo kepeleu shürotsa tuoitatuo.

¹⁵Puoe puo ki vakhriepfü thalie tuoütuo, derei süu thalie lho; puo süu theze tsalietuo, derei süu bachalie lho

¹⁶Themia kesuomia niaki mhodzünu kuolie, mu uko coko krapie tezieko tshulieya.

¹⁷Uko mieko ketsieko whipfülie, tsiu ketsie donu lhou baya.

¹⁸Mhanuü uko tha nunu uko pekawa, sitse süu puo phramvü di sie, ‘A n ngu moto zo’ itatuo.

¹⁹Harie, hauha puo neiyakezha chau, tsiu kijüu gei kekreimia lhoulietuo.

²⁰“Harie, Ukepenuopfü themia kejokejümia khawalie lho, morei puoe mha kesuo kechümia khruohilie lho.

²¹Puoe kenyü pie n me ketshu chüshütuo, tsiu kenei pie n suo nie gei shüshütuo.

²²N ngumecüya kezhamia mengakecüpie u pfhenei chütuo; tsiu kerüzhümia pfheki ba motatuo” sita.