Read Angami Naga Job 9 Bible Online

Job 9 - Angami Naga bible

Job 9

¹Sitse Job-e puo die kela di sie:

²“A süu ketho zokecü si tou ba; derei themiae kedipuo mhie di Ukepenuopfü mhodzü mezhülie ta?

³Mhanuü puoe puo ze kemeütuoü zorei, puoe va nyie puo donu va puo zorei puo kelalie kenjü.

⁴Puoe thenou mhasi nyi, tsiu kuothor zo. Supuonie puo ze keperhie di kuolietuo ga?

⁵Puoe kijüthouko bie kediwaya, mu uko süu si motaya; puoe puo neimoketa ki uko bie pekhepelawaya.

⁶Puoe puo tha nunu kijüu shükenieshü, tsiu süu mvüdzeko bie kemeleshü.

⁷Puoe niaki ki diekhashü, süu thusier mota; mu themvüko bu rüshüta.

⁸Puo rübei teiko lhashü, tsiu dzükezhako gei tuo voya.[18]

⁹Puoe Rhupieko, mu Zuthiekroko, tsiu Tsüba mu pekhrotsa mhabouko chüshü.

¹⁰Puoe sitsolie kelho mhakezhakecha chüshü, mha u ngo zokecü phrü hulie kelho chüshü.

¹¹Harie, puoe a cie voya, sirei a puo nguya mo; puoe meletuoya, derei a puo silie motaya.

¹²Harie, puoe mezalieya, supuonie puo khalie vi ga? Supuonie puo ki, ‘No kedipuo chüya ga?’ ikecü pulie ta.

¹³“Ukepenuopfüe puo nouyie kethelie lho, Rahab kekhruohiko puo khro nuketsu.

¹⁴A we kedipuomhie di puo die kelatuo shi, kedipuo mhie di a dieko kedalietuo shi?

¹⁵Puo gei, a mezhü zoürei, a puo die kelalie lho, sirei a pejokezhau[19] ki a mezhiemelotuo.

¹⁶Mhanuü a puo kieshü, tsiu puo a die kelashü; sirei puo a pfhe rünyülietuoükecü a pelelie lho.

¹⁷Puoe teikhrie khriedi bu a bietshebietshawate, tsiu puoca kejü nu a kechüpfü chüpekrashü keta la.

¹⁸Puoe a bu halieketuo chüshülie lho, derei mhakepfhü pie a ketshu chüshüte.

¹⁹Mhanuü a kekuo dze putuoü ro, harie, puoe kuo! Tsiu a kethocau dze putuoü ro, supuonie puo pejolie vituo ga?

²⁰Mhanuü a thuo mezhü üshierei, a tie thuo zorei a pejotatuo. Mhanuü ae sie, a kejo jü, sirei süu a kekrü ücü thashü zotuo.

²¹Ae kejojü, sirei a thuo a si tsei mo, a thuo a kerheiro mecüta zo.

²²Hauha mhaca puo zo; süla a süu puya, puoe kejokejüko mu kesuokechüko kenienie pekawaya.

²³Kepeka vor di sia mhatacü ki, puoe kejokejümia kemezhiekelie ki rei nyübatatuo.

²⁴Kijüu khapie themia kesuomia dzienu shüwate; puo capimiako zie whewate; puo süu moü liro, süu supuo ga?

²⁵“A teisozhakoe taketuomia kirei rükrikuote, ukoe ta votaya, ukoe mha kevi nguya mo.

²⁶Teikhrie ta kevi tuoi, uko votaya, tsüüra thu kevo tuoi votaya

²⁷Ae sie, ‘Panyaparakecü rükra motatuo; a a noukesuoko khawatuo, sidi a neitatuo’ ishierei,

²⁸A kemezhiekecüko prei bate, no a üse kejo jü ücü pulie lho kecü a si baketa la.

²⁹A pejowatuoü ro; kiüdi a kemethuo nu mhachümhalie tuoya shi?

³⁰A a thuo sabou pie a khrüwa zorei, mu soda pie a dzie metei kemesawa zorei.

³¹No a khapie kerhu nu shü lawa zotuo, tsiu a pfhenei thuo zorei a rütsetatuo.

³²Kekreilamonyü puoe a tuoikecü kesia phou kepfümia mo, süla a puo die kelalie kenjü, mu we dienyakecü kecü nu keze philie kenjü.

³³Morei hienie donu themia thecathepi[20] kechü rei tuo mo, süusü puo dzie pie hienie kenienie geishülie kevi themia tuo mo.

³⁴Puo bu a geinu puo seiro-u chüsetaliecie, tsiu puo preikecü bu a kede motaücüwe.

³⁵Sitse a puo preita mo di die pulietuo; a a thuo a leyakezha mhie moükecü si keba la.[21]