Read Angami Naga Chieliko 10 Bible Online

Chieliko 10 - Angami Naga bible

Chieliko 10

¹Jihova, kiüdi no ratsa tha zo ga? Kemezhiekecü teiki kiüdi n thuo n kevieta ga?

²Kerüzhükoe kerüzha di kejüko pese tuote; uko rhükelie doko bu uko teliecie.

³Kerüzhükoe u melou kemenguko se kemelhaya, u ya vi nyü di u meda kesuoko Jihova rüse mu melieya.

⁴Kemiakokecü pie u zie reiketuokoe sie, “Jihovae pfhü kepacü lho” iya; uko kele pete rei, “Ukepenuopfü tuo mo” iya.

⁵Uko chako vi kehielie seiya; n thecako rükrie, uko kengu nu mo, ukoe u ngumvü pete üse mhathokemoü kre nyüsietuote.

⁶Uko thuo u nou nu pu di, “A rüsierünielie kenjü: nuosenuoyie thephou pete kemezhietalie lho” siya.

⁷Uko tie sü mia kerüse mu mia kese, tsiu mia kepese thuo tshu; uko meü khro sü mhatho kesuo mu kemethuokemeruo sie sa mo.

⁸Uko rünako nu rüshü di mia rü baya; ukoe kepekhrera nu u kejo kejüko dukhriya. Uko mhi-e kejümia petsou baya.

⁹Loshae rüshükezhü tuoi uko kepekhrera nu mia pfhezhüya; ukoe kejüko telietuoü rüshü baya: uko kejümia tepie kebie nu shülieya.

¹⁰Uko nukelieya, gulieya, sidi kekhruohi kejüko uko kekuo nu tetsutaya.

¹¹Uko melou nunu: “Ukepenuopfüe rükra mote; puoe puo zie kevieliete, puo mhakipuorei ngu lho” ibaya.

¹²Sieliecie, Jihova Ukepenuopfü, n dzie yhashücie; mia bu u pesekezhako rükra mota hieyi.

¹³Kiüdi kerüzhümia Ukepenuopfü meliewaya? Uko u nou nu sie, “Puo hau la a kiepie ketso zo lho” siya.

¹⁴Derei noe nguya; ketho, noe süko pie n dzienu shülieya. Ketsopfhüko we uthuo u khapie n tsüshü; no sü u krünuo kejümia yakepieu zo.

¹⁵Kerüzhümia mu kesuomia bou bietshewalie; mu u kerüzhüko pfhü pejüwa kemochie pfhüwaliecie.

¹⁶Jihova we telhekecha Kediu zo: seyieko we puo kijü nu kaüjütaya.

¹⁷Jihova, noe rünuokelieko mengu siya, no uko melou chü pekuoshütuo, n nyie kedeipie uko pfhe situo.

¹⁸U krü kejüko mu mia u pesekezhako capiu chütuo, kijünumiako bu u kede sa molieketuo la.