Read Angami Naga Chieliko 104 Bible Online

Chieliko 104 - Angami Naga bible

Chieliko 104

¹Jihova tshelie, harie a ruopfü. Harie Jihova a Kepenuopfü, no sü zha! Therhu mu kemesü üse n pfhenei chü.

²Kezie üse pfhe puo tuoi di n whepfü tuoyakezhau, noe teiko üse dzüpfheki puo tuoi di shü petoshü.

³No n kibou kirieko pie dzü mho seshü, noe kimhouko pie gura gari chüshü, noe teikhrie süko geinu tuoya.

⁴Noe teikhrieko pie n dieliemia chü, mi mu miü pie n liethomia chü.

⁵Puo bu kechachie rünielie kelho la, no kijü pie puo mvüdze nu dzeshü.

⁶No pfhe puo tuoi di kesouu pie kijü wheshü, dzüko kijüthou mho thata.

⁷No kerhieshü tse uko tate, n teise pfhe sikecü ki uko kenourhei tuota.

⁸Uko kijüthou gei kho, mu kijü razhako nu tsu, noe uko la kesekeshüu nu.

⁹Noe uko bu ciepalie kelho therie rhieshüwate, uko bu la vo kijüu zewa molieketuo la.

¹⁰No dzüluoko ketsepie razhako nu shüya, süko kijüthouko donunu kruzhüya.

¹¹Sidi kekrie khapie nhachü khe tsüya, nha gadako u terhü tshülieya.

¹²Süko nu teirako uko baüzhü nyilieya, süko seicoko donunu ruo baya.

¹³No kerükrie geinu dzüpie kijüthouko tsheshüya, kijüue n mhatho si üse puo kelhuo chüpfü ba.

¹⁴Puo kiriko la nha bu the parya, tsiu themia la ga menyie ciekelie, sidi kijü nunu kecüca bu parlieya.

¹⁵Tsiu themia bu kedzülelieketuo la khubezu khashü, puo zie chü pezieshüketuo la tier, tsiu themia nou chü pekuoshüketuo niekhrüda.

¹⁶Jihova seiboko sü dzü pie va kemenuose ba, puoe leikeshü Lebanon nu sedar boko.

¹⁷Süko geinu pera u kru chü, Nyümvüü kru la fir bo.

¹⁸Kijüthou kerükrieko thelouko la, tsiu tsiekhieko zogazu ki.

¹⁹Khrüe puotei kekreikreikecüko thashüya, niaki-e puo kele teiu thashüya,

²⁰No kezei chüshü, mu süu theva taya, süki ketsa nu nhachü pete gou parya.

²¹Losha nuonuoe u chüte pfhü di ruoya, sidi Kepenuopfü kinu uko ca pfhüya.

²²Niaki thukesier ki uko lataya, sidi uko tsiepfüko nu zhütaya.

²³Sitse themia puo mhatho nu volieya, mu thevatie lie kemochie puo mhatho nu tuoya.

²⁴He-i Jihova, n mhathoko kra zalie! n kesikele nunu no süko pete chüshü, kijüu n kinyi tshupfü ba.

²⁵Lutsakhie dzükezha ba, zha mu meya, sünu phrü huliekelho gouketuoko tuoya, khunuo kecü rei kezha rei.

²⁶Rouko sünu voya, sünu Leviathan tuoya, no puo bu sünunu rüzhü tuonu di chükeshüu.

²⁷Hako pete n merü baya, puotei tou ki uko ca khashüketuo la.

²⁸No khapie uko ketsü ki, ukoe kengulieya; No n dzie kelhakeshü ki, mha kevi se uko kelhuo chülieya.

²⁹No n zie kevielieketa ki, uko u dzüzeiya; no uko keha seketa ki uko siataya, sidi nyophe nu votaya.

³⁰No N ruopfü ketseshü ro uko chüürhilieya, sidi n kijüu zie chü kesa lashüya.

³¹Jihova zapuzayieu bu kechachie baliecie, Jihova bu puo mhathoko nunu puo neiliecie.

³²Puo kijüu mehoshü ro süu petaya, puo kijüthouko bieshü ro süko khutaya.

³³A a rheichie kelipie Jihova ki shütuo, a lhoukebachie ketshe tsali chüpie a Kepenuopfü ki shütuo.

³⁴A kelekemedoko bu puo nei chülie üthienyü, a Jihova nunu a neiyakezha la.

³⁵Kephoumamia bu kijüu nunu jütacie, mu kerüzhümia bu tuo motacie, Jihova tshelie, harie a ruopfü! Jihova tsheliecie.