Read Angami Naga Chieliko 105 Bible Online

Chieliko 105 - Angami Naga bible

Chieliko 105

¹Harie, Jihova thezieliecie, puo za kieliecie, themiako donu puo mhatho pesishülie.

²Kelipie puo ki shülie, ketshe tsali chü puo ki shülie; Puoe chükeshü ungomhatho pete pushülie.

³Puo za kemesau bu zayie chülie, Jihova pfhüyakezhako nou bu u neilie.

⁴Jihova mu puo kekuo pfhülie, Puo zie pfhü seilie.

⁵Puo chükeshü ungomhathoko rükralie, u ngo zocü chükeshüko, tsiu puo tie nunu kepar thecathepiko.

⁶Harie nie puo kituo Abraham tsiako, nie Jakob nuonuoko, puoe kedakelieko.

⁷Puoe Jihova úko Kepenuopfü, puo capiko kijü pete nu tuo.

⁸Puo kechachie puo dietseidiekho-u rükra sei tuoya, thephou thenyie-e ki pukeshü dieu.

⁹Abraham ze dietseidiekhokelie, mu Isak ki rüsepie kezhüu.

¹⁰Thezho puo la süu chü kemetei pie Jakob ki keshüu, kechachie la Israel ki dietseidiekhokeshüu.

¹¹sidi sie, “A Kanan kijü pie n tsütuo, pie n ya thekau chütuo.” isi.

¹²Uko themia keduo yopuo zocü ki, u zo, tsa phi di sünu rüso chü,

¹³Uko rüyie seyie puo nunu seyie kekrei puo ki vo, kedirüvie puo nunu themia la kekrei puo ki vo.

¹⁴Puo mia puo bu rei uko pese mo, puo uko la kediko rei kerhie:

¹⁵sidi sie, “Ae kenhekelieko bie hiecie, mu a siedzekesiko pechü hie” isi.

¹⁶Puo pekriekecü kiepie kijüu nu shü di uko kecüca pete pekawa;

¹⁷Puo mia puo ketsepie uko mhodzü shü; mia diemia chütuoü zekewa Josef.

¹⁸Uko thegiro pie puo phi pechü, thegi vokha pie puo vo gei shü.

¹⁹Puo pukeshüu tseilie kemochie, Jihova dieu puo dojü tuo tso.

²⁰Kediu mia ketseshü di puo phreishüwa, themiako kekhakezhau bu puo khashüwa.

²¹Puoe puo chüpie kinu mho niepu chüshü, tsiu puo vie pete mho kezhau chüshü,

²²Puo medo chü di kedinuonuoko tahitarho mu mhasi pie puo phichüko pethaketuo la.

²³Sidi Israel-e Ijipt nu vorlie; Jakob Ham kijü nu solhimia chü di lhou.

²⁴Mu Jihovae puo themiako chü pekruo phishü; puoe uko chüpie uko ngumvüko ki kuokuoshü.

²⁵Puoe süko chüpie puo themiako ngumecüta, puo kituoko gei u do vi selietuo üdi.

²⁶Puo puo kituou Mosa, mu puoe kedakelieu Aron ketseshü.

²⁷Unie süko donunu puo zasiko, mu Ham kijü nunu puo vie u ngo zocüko chüshü.

²⁸Puo kezei ketseshü di kijü chü pezeiwa; süla uko puo dieko zemvü mota.

²⁹Puo uko dzü chüpie thezie meviwa di uko khuoko pesiawa.

³⁰Guorünuo uko kijü ketshu chüta, uko kedimia kiluoko nu rei.

³¹Puo die pushü, sitse teizie krodi vorlie, mu uko kijü pete nu telhie vorta.

³²Puo teirü meseu prü pekrüshü, mu uko kijü pete nu tei kemelashü.

³³Puo uko khubeboko mu uko chiedeboko wiwa, mu uko kijü nu seiboko bietshewa.

³⁴Puo die pushü, sitse kuprieko rei vorlie, mu kuprie nuoko phrühulie kelho chüta;

³⁵sükoe uko kijü nu ga pete cülieta. mu uko rüna nu nhasi pete cülieta.

³⁶Puo uko rüna nu nuorie pete vükhriwa, uko kekuotho ki si kerieko.

³⁷Sidi puo raka mu suna se uko ze parlie, tsiu puo seyieko donu kethachü puorei tuo mo.

³⁸Uko tuoketa ki Ijipt puo neita; uko keprei-e süko gei vorketa la.

³⁹Puo kimhou pie uko keya chüshü, mu teizei gei uko vapezieketuo la mi khashü.

⁴⁰Ukoe cha, ru puo vüpfhi se vorshü; mu teigei niakhrüda pie uko kelhuo chüshü.

⁴¹Puo tsiekrieu khrüshü, sitse dzüko kruparlie, süko kerü puo tuoi rayha nu kru vota.

⁴²Puo puo die phrakeshü kemesau, mu puo kituo Abraham rükra keba la.

⁴³Puoe kenei nunu puo themiako mu thenoukemvü nunu puoe kedakelieko ze parlie.

⁴⁴Puoe seyieko kijüko khapie uko tsü, mu uko bu seyieko mhatho pevielie.

⁴⁵Uko bu puozhoko medzilie, mu puo thezhoko se balieketuo la. Jihova tsheliecie.