Read Angami Naga Chieliko 107 Bible Online

Chieliko 107 - Angami Naga bible

Chieliko 107

¹Harie Jihova thezieliecie, puoe vicü la; Puo kekhrie sü kechachie baya zocü la.

²Jihovae rhakelieko bu haicü pucie, ngumvümia dzie nunu rhakelieko bu,

³Kijükouü nunu kengukelieko bu, niathutsa nu niakratsa ketso, pesotsa nu pekhrotsa ketso.[57]

⁴Uko rayha nu rühou mia tuoya kemo cha nu vota, uko lhoulieketuo nadi puorei ngulie mo.

⁵Uko terhümerü mu uko nou phisiata.

⁶Sitse uko kemezhiekelie ze Jihova ki melieshü, mu puo uko mezhieko nunu uko shüphrashü.

⁷Puo uko ta ze cha kemezhüu nu voshü, uko bu nadi nu vo di lhoulieketuo la.

⁸Hou, themianuo bu Jihova ketseikevi la, mu themia nuonuo gei chükeshü puo mhatho u ngo zocüko la puo tshelieücü we!

⁹Puoe keterhümia kelhuo chüshüya, mu mha kevi pie kemerümia ketshu chüshüyacü la.

¹⁰Kemezhiekecü mu thegiroko pie u phapfü di kezei mu kesia khrü nu kebako.

¹¹Uko Ukepenuopfü dieko perhiepetsouta mu kerükrietho-u die rütseketa la.

¹²Süla puoe kemezhiekecü nunu uko nou chü perewa; uko tetsuta mu miapuorei uko kekhruo jü.

¹³Sitse uko kemezhiekelie nu Jihova ki melieshü, mu Puoe uko kemezhiekecüko nunu uko kelashü.

¹⁴Puoe kezei mu kesia khrü nunu uko ze parshü, mu uko phako bietshebietshawa.

¹⁵Hou, themianuo bu Jihova ketseikevi la, mu themia nuonuo gei chükeshü puo mhatho u ngo zocüko la puo tshelieücü we!

¹⁶Puoe merenyi kharuko bietshewa, mu thegiroko dathewaketa la.

¹⁷Huomia u kephoumako la kechükenyü[58] ngulie, mu u kemouko la kemezhielie.

¹⁸Kecüca pete uko füta, mu uko kesia kharuko penuo vo.

¹⁹Uko mezhieu nunu meliepie Jihova ki shü, mu puoe uko mezhieko nunu uko kelashü.

²⁰Puoe puo die ketseshü di uko chü keshürhoshü, mu puoe uko kepekako nunu uko shüphralie.

²¹Rüdirüliyakemo puo kekhrieu la, uko bu Jihova thezielie, mu themia nuonuo gei ungomhathoko la puo tshelieücü we!

²²Uko bu kethezie khakeshü ruosuoko chülie, mu u nei di puo mhathoko pesishücie.

²³Rou nunu dzükezha nu tsuyakezhako, dzükezhako nunu thelhi chüyakezhako.

²⁴Sükoe Jihova mhathoko, mu kesou nunu puo mhatho u ngocüko nguya.

²⁵Puoe die khashü di khriedi pesieshü, süko dzürüpfhü pesieshüya.

²⁶Süko teiko gei sie di kesouko nu lata; kepeka kevor ki uko kethepfu ze jüte.

²⁷Uko rüge lutsahatsa va, mu kemezemia tuoi pevüvütaya, mu uko ziekejü chütaya.

²⁸Uko mezhie nunu Jihova ki melieshü, mu Puoe uko mezhieko nunu uko se parshü.

²⁹Puoe khriedi chü pebiewa, süla dzürüpfhüko zeita.

³⁰Sitse mha süko kemekrieketa la uko neilie; sidi puoe uko ze vo mengu ketuo rüleichü nu shü.

³¹Uko bu Jihova ketseikevi la, mu themia nuo gei chükeshü mhatho u ngo zocüko la puo tshelieücü we!

³²Uko bu krodi kehou nunu rei puo chü pezhaliecie, tsiu phichüko kehou nunu puo tsheliecie.

³³Puoe kerüko chüpie rayha chüshü, mu dzüluoko chüpie kijü keso chüshü.

³⁴Sünu kelhouko kerüzhü la krokezhü kijüu chüpie vakewa metsie kijü chüshü.

³⁵Puoe rayha chüpie rüzie puo chüshü, tsiu kijü keso pie dzüluo kenyi chüshü.

³⁶Merü ketuoko bu sünu lhoulie, uko bu rüna chülie kevi nadi puo ngulie.

³⁷Liecielie, khube pelhoulie, puo lieyie bu vi selie.

³⁸Puo jakeshü geinu, süla uko kruo philie; siro puoe uko kiri bu tsata molie.

³⁹Mia uko kepese la, uko bu kemezhie, mu u nou suo di tsa mu rünuo tsuketa la;

⁴⁰Puoe kekuo kesemiako rütse phita, uko cha kejü rayha nu rühou tuota.

⁴¹Siürei puoe kemezhiekecü nunu ketsopfhüu chü kerükrieshü, mu süunuo kikruko chüpie tekuo kro tuoishü.

⁴²Kemezhüko süu ngu di u neilie, mu kerüzhüko tie dawa.

⁴³Kehoupuorei mhakesimia mha hako meho di Jihova u khrielekhriethorcü lecie.