Read Angami Naga Chieliko 118 Bible Online

Chieliko 118 - Angami Naga bible

Chieliko 118

¹Harie, kethezie khapie Jihova tsücie; puoe vi zocü la; puo kekhrie kechachie bayacü la.

²Israel bu pucie, “Puo kekhrie kechachie baya” isilie.

³Aron kikru bu pucie: “Puo kekhrie kechachie baya” isilie.

⁴Jihova preiürhuyakezhako bu pucie, “Puo kekhrie kechachie baya” isilie.

⁵A kemezhiekelie nu Jihova kie, Jihovae a pfhekhoshü di a pie thechü kemeya puo nu chüshü.

⁶Jihova a kitsa, a michielie lho, chüüphou kepfümia a gei kedipuo chülie vi ta?

⁷Jihovae a kitsa, a khruohiketuo la; A a ngumvümia mho kuokelie ngu zotuo.

⁸Themia pelekecüu ki rei, Jihova rüzhükelie we vikuo.

⁹Kekuo kesemia pelekecüu kirei, Jihova rüzhükelie we vikuo.

¹⁰Seyie peteko a houpfülie, Jihova za nunu a uko dathewa.

¹¹Uko a houpfülie, a khie a mhou pete houpfülie; Jihova za nunu a uko dathewa.

¹²Uko mepfhi kemhie a houpfülie; zohu mi tuoi uko tu par; Jihova za nunu a uko dathewa.

¹³A ne petoshü,[62] a tetsuta nyüta, derei Jihova a khruohishü.

¹⁴Jihova sü a kekuou mu a tsaliu; Puoe a kelakelieu chüte.

¹⁵Kemiathomia pfheki nu kuokelie kenei tsali ba: “Jihova dzie puo zatsa mhachü kethepfuya;

¹⁶Jihova dzie thezatsa pie kerükrie se siete, Jihova dzie puo zatsa thepfu se di mhachü!”

¹⁷A siata lho, rheilietuo, sidi Jihova mhathoko pu pesishütuo.

¹⁸Jihovae siazha pie a pechüshü; derei a pie kesia tsüwa mo.

¹⁹Kemiatho careko khrüpie a tsücie; a sünu le di Jihova tshetuo.

²⁰Hauha Jihova care zo, kemiathomia sünunu letuo.

²¹A N thezietuo, a pfhekhokeshü la, sidi a kelakelieu chüte.

²²Kikechükoe vakewa tsieu pie puoke tsie kemeyieu chüliete.

²³Hauha Jihova mhatho, u mhiki u ngo zo.

²⁴Teisozha hau Jihova thuo chüshü; hau nu u nei mu u noumvülie khe.

²⁵Hie kelashücie, hie n ki chaya, he-i Jihova. Hie n ki chaya, Jihova, hie piesieshücie.

²⁶Jihova za nunu kevor-u thejakepfüu zo. Hie Jihova ki nunu japie nie tsüya.

²⁷Jihova sü Ukepenuopfü zo, puoe kezie pie u tsüshüte. Seico pie u nei di thaketuoko kete ze, ruosuoba kiako ketso vocie.

²⁸No a Kepenuopfü zo, a kethezie pie n tsütuo; no a Kepenuopfü zo, a n pie kerükrietuo.

²⁹Kethezie pie Jihova tsülie, puoe vicü la; Puo kekhrie kechachie bayacü la.