Read Angami Naga Chieliko 119 Bible Online

Chieliko 119 - Angami Naga bible

Chieliko 119

¹U cha nu pejolie kelhomia thejakepfümia zo, Jihova zho nu tuoyakezhako.

²Puo dieko zeyakezhamia, u nou pete se puo kepfhümia thejakepfümia zo.

³Kekrü kemomiako; mu puo chako nu ketuoko rei.

⁴Noe chünukeshü dieko khashü, hie bu ze terülienu di.

⁵He-i, n die ki ze a chako bu meteilie ücü we!

⁶Silie tse a thenga chütalie lho, a n die khakeshüko meho terükelie sie.

⁷A thenou kemezhü se di a n tshetuo, n kemiatho cau sikelie ki.

⁸A n zhoko medzituo, He-i a khakegewa hiecü mu!

⁹Kimhie di khriesamia rüli mesa balie ta? N dieu ze pecü di lhoukelie geinutuo.

¹⁰A a melou pete se n pfhü; a bu n dieko nunu rütsita hiecü mu!

¹¹A melou nu n dieu le peviya, n gei kephouma chü molieketuo la.

¹²He-i Jihova, n ketsheu chücie; n zhoko pie a pethashücie.

¹³A a tie pie no chünukeshü dieko pete pu pesiya.

¹⁴Ae n zhapuko chau nu a neiya; kishükinyi neiü la u neiyakezha de.

¹⁵A n zhoko medotuo, mu n chako meho terütuo.

¹⁶N die khakeshüko nu a neituo; a n die rükra mota lho.

¹⁷N kituou gei mephruomevuoshücie, a rheilie mu n die zelieketuo la.

¹⁸A mhi chü kemhirhoshücie, a bu n zho-u nu a ngocü ngucie.

¹⁹Kijü nu a solhimia puo zo; n diekhakeshüko pie a kinu keviewa hieyi.

²⁰A ruopfüe puotei pete nu n zhoko mengu di meyhumezhie.

²¹Noe kethesükecüko, rüsekepfüko ruoshü, chünukeshüko nunu rüyoketuoko rei, kerhiewate.

²²Uko a krenyü mu a zha sekewako a kinu setacie; ae n dieko zekecü la.

²³Kekuo kesemia a kepetsou pu ba zorei, n kituou we n zhoko le medo ba zotuo.

²⁴N dieko sü a nei, süko a rüchümia zo.

²⁵A ruopfü nyophe ku tuoya; n die ki ze a chü perheishücie.

²⁶A keleko pushü ru, no a khoshü; no rhükelie pie a pethashü.

²⁷A bu n kepethadie chako siliecie; sitse a n mhatho u ngocüko medotuo.

²⁸A ruopfüe nousuo la zejü vota, n die ki ze di a chü pekuoshücie.

²⁹Kecürü se a kinu pecietacie; n ketseikevi nunu n zho-u pie a pethashücie.

³⁰Chüsechü pelekecü chau a zete; no khakeshü n zhoko pie a dzüki shüliete.

³¹No thezho khakeshüko se kemetei tuote; he-i Jihova, a pie kethenga nu shüwa hiecie.

³²No diekhakeshüko chau nu ta votuo, no a kesikele chü pezhakeshü la.

³³He-i Jihova, no rhükelie zhoko pie a pethashücie; sitse a thela ketso süko zelietuo.

³⁴Mhakele pie a tsücie, sitse a n zho zelietuo; a melou pete pie süu zelietuo.

³⁵A ze n diekhakeshü zho nu vocie; a süu a neiya.

³⁶A nou chüpie no thezho khakeshüko kitsa vacie, mha kemehoutsa vata mo di.

³⁷Kemelhakecü vie kemeho nunu a mhi kereiwacie, mu n cha nu a chü perheishücie.

³⁸N kituou ki phrakeshüu chü kemeteishüyi, süu n preiürhuyakezhako la.

³⁹A mengakelie prei kebau bie kediwacie; no khakeshü dieko vicü la.

⁴⁰Harie, a n kele zhoko mengu; n kemiatho-u nunu a chü perheishücie.

⁴¹Rüdirüli kemo n kekhrie bu a ki vorcie, he-i Jihova, n die ki ze n kelakelie burei;

⁴²Siliero mia a kengakecü die kelashülietuo, a n die peleyakecü la.

⁴³A tie nunu kethodieu seta hieyi; no khakeshü zho gei a kemerü tuokecü la.

⁴⁴Siro a kechachie n zhoko ze sei tuo zotuo.

⁴⁵Mu a kerei moto di tuotuo; a n kele zho pfhükelie la.

⁴⁶No ahza khakeshüko pie kediko mhodzünu putuo, mu a thenga chüwalie lho.

⁴⁷Ae no chünukeshü zhoko nu a kenei ngulieyakezha la.

⁴⁸A no chünukeshü zhoko rhuya, mu no rhükelie zhoko leümedoya.

⁴⁹N kituou ki keshü n die rükrashücie, sünu a kemerü nyi.

⁵⁰Hau nunu a nouzhieko thupeluolie, noe chüshütuoü pukeshü die nunu a noumvülie.

⁵¹Mia rünyüya kemoko a pie kethekre phi; siüderei a n zhoko nunu rüreita mo zo.

⁵²He-i Jihova, a thiedzü no khakeshü zhoko rükralie, sidi a nou thupeluolie.

⁵³Kelhiekecüko la a nei mo phi, n zho khakewako la.

⁵⁴A kehourarei a ki chükelieu nu, no rhükelie zhoko pie a tsali chü.

⁵⁵He-i Jihova, a theva gei n za rükralieya, sidi n zhoko se balieya.

⁵⁶Theja pie a vie chülie, n kele zho pie bakelie la.

⁵⁷He-i Jihova, no sü a yau zo; a n dieko zelietuoü a phrashüya.

⁵⁸A nou pete se n zie pfhü; n die ki ze a ngumezhiecü mu.

⁵⁹N chako medokesie ki a phi kereipie no khakeshü zho kitsa valie.

⁶⁰A rükrishü, menyhota mo, n diekhakeshüko zelieketuo la.

⁶¹Kelhiecümia roko a ma zorei, a n zho-u rükra mota mo.

⁶²A khisoteiluo sie n thezie, no khakeshü dieko vicü la.

⁶³N preiyakezha pete a pezamia, mu n kele zho zeyakezha khe a khriethomia.

⁶⁴He-i Jihova, kijü ha rüdirülikemo n kekhrie thuo tshupfü ba, no rhükelie zho pie a pethashücie.

⁶⁵He-i Jihova, no n die ki ze n kituou gei vi shü.

⁶⁶Theca kevi mu mhasi pie a pethashücie, n diekhakeshüko a peleyacü la.

⁶⁷A pechü kemo ki we a rütsi, derei tsie we n die zete.

⁶⁸Noe vi mu mha kevi chüya; no rhükelie zhoko pie a pethashücie.

⁶⁹Mia rünyü kemoko ketijü pu a da; derei a nou pete se noe rhükelie dieko zetuo.

⁷⁰Uko meloue chüshuo tuoi shuo; derei a we n zho-u nu a neiya.

⁷¹A bie kerünuokeshü ha a la vi; no rhükelie zho a bu silieketuo la.

⁷²N tienu zho-ue a la sunaraka nyienyie kirei vikuo.

⁷³N dzie-e a chüshü mu a rhishü; mhasimhale pie a tsücie; a bu n diekhakeshüko silieketuo la.

⁷⁴N khrü preiyakezhako a ngucü ki u neilietuo, a kemerü-e n dieu gei tuokecü la.

⁷⁵He-i Jihova, n cako kethokecü a si, mu no kedietho nunu a pechüshü.

⁷⁶Rüdirüli kemo n kekhrie bu a nou thupeluo cümu, n kituou gei n die phrakeshü ki ze.

⁷⁷N nouzhieu bu a gei vorcie, sitse a rheilietuo, n zhoe a keneiu zocü la.

⁷⁸Mia rünyü kemoko bu thenga chütacie, ukoe unou kerhu nunu a pfüpelashücü la; derei a we n keledieko le zotuo.

⁷⁹N preiyakezhako bu rürei a kitsa valiecie, sidi uko bu no khakeshü dieko lelieketuo la.

⁸⁰A melou bu n zhoko kitsa pejolie kelho chücie, sitse a thenga chü molietuo.

⁸¹N kinu kevor kelakelie mengu di a ruopfüe meyhumezhiete; a kemerü n dieu gei ba.

⁸²N die kevor meho di a mhi merüte, a bu sie, “No kicükipuo a nou chüpeluo ta?” iba.

⁸³A sü mikhu nu chüzhü sü puo mhiete, siüderei no rhükelie zhoko rükra mota mo zo.

⁸⁴Zha kitsuo n kituoue kege se balie ta? No kicükipuo a pechüpenyüyakezhako gei theca chüshütieya ga?

⁸⁵Mia rünyüya kemokoe a la thekhe thieliete, uko n zho varhuoya.

⁸⁶No diekhakeshüko pete puotou; puoca kejü nu a pechüwate; a khruoshücie.

⁸⁷Ukoe kijüu nu a bie pejüwa nyünuo zo, derei a n kele zhoko khawa mo.

⁸⁸N kekhrie ngukemezhie nu a chü perheishüyi; sitse a n tienu zhoko medzilietuo.

⁸⁹Jihova, kechachie baya, n dieu kechachie teigei bate.

⁹⁰N dietho sü thephou pete gei ba, no kijüu chüshü mu süu metei ba zo.

⁹¹Thie ketso rei n medo la mha pete ba, pete rei n kituomia zocü la.

⁹²N zho-u nu a neilie mo ücüwe, kemengakecü nunu a kata zotuo.

⁹³A mhakipuorei n kele zhoko rükra motalie lho; süko pie noe a chü perheishü.

⁹⁴A n vie zo, a kelaliecie; a n kele zhoko zetuoü pfhükelie la.

⁹⁵Kelhiekoe a pekawatuoü pfhe ba; derei a we no thezho khakeshüko le ba zotuo.

⁹⁶Mha vi tseikecü pete puo thela ba phrekecü a ngu, derei n diekhakeshüko we meyathor.

⁹⁷Hou, kide n zho a nei shi! a zhate süu lemedoya.

⁹⁸N diekhakeshüko la a chüpie a ngumvüko kirei mhasikuoshüte, sü a ze seituoyacü la.

⁹⁹A kepethako ki rei a kesikele kra, kekreilamonyü no khakeshü dieko lemedoyacü la.

¹⁰⁰A phichüko ki kesikele krakuo, kekreilamonyü a n kele zhoko zekecü la.

¹⁰¹N die ze balieketuo la kesuo cha pete nu a phi chashü moliete.

¹⁰²No khakeshü dienu a rüreitaya mo, no a pethashüwaketa la.

¹⁰³N dieko a me nu mou! a me nu mepfhidzü kirei moukuo!

¹⁰⁴N kele zhoko nunu a mhasilieya; süla ketijü cha pete ngumecü.

¹⁰⁵N die-e a phi la mitubou puo, mu a cha nu kezie puo.

¹⁰⁶N kemiatho zhoko medzituoü a rüse zo di puwate.

¹⁰⁷He-i Jihova, a kemezhie phite, n die ki ze a chü perheishücie.

¹⁰⁸He-i Jihova, a tie nu kethezie khakeshüko lieliecie, sidi n zhoko pie a pethashücie.

¹⁰⁹A kelhoue a dzie nu ba sei zoürei a n zho-u rükra mota mo.

¹¹⁰Kelhiekoe a la kebie puo khapie zhü; derei a n zhoko nunu rütsita mo.

¹¹¹No khakeshü dieko a la kechachie kayie chü, süko a melou nukeneicü la.

¹¹²No rhükelie zhoko zetuoü a melou sütsa va kechachie puo thela ketso.

¹¹³A nou kenieko ngumecü; derei n zho we a nei.

¹¹⁴Noe a keyau mu a zhüu zo; a kemerüe n dieu gei ba.

¹¹⁵Nie kesuo kechüko, tuo a thertacie, a bu a Kepenuopfü dieko zelieketuo la.

¹¹⁶N dieki ze a mengu pielie, a bu rheilieketuo la, a bu a kemerüu la mengata hiecie.

¹¹⁷A mengu pielie silie ro a kelalietuo, mu n zhoko rhu sei tuolietuo.

¹¹⁸Noe rhükelie zhoko medzi tuoya kemoko pete khawate, mhase ketuoko mharhüe kemethuo zocü la.

¹¹⁹Noe kijü nu kerüzhü pete nyorhu mhie di vawate, süla a n zhapu dieko a nei.

¹²⁰A chü n prei di peya; mu a n cako rei preiya.

¹²¹Ae mha puotou mu diethokecüu chü; a khapie a peseyakezhako dzienu shü hiecie.

¹²²N kituou dzevi la puo se baliecie; u rhuo kejüko bu a peseta hiecie

¹²³A mhi-e n kelakelie mu n kemiatho dieu kepfhü la meziete.

¹²⁴N kekhrie rüdirüli kemo pie n kituou gei shü mu no rhükelie zhoko pie a pethashücie.

¹²⁵A n kituou zo; kesikelie pie a tsücie, no khakeshü dieko a bu silieketuo la.

¹²⁶Jihova, no tsie sieshü morosuote; n zho bierhuowaketa la.

¹²⁷N diekhakeshüko a nei zo suna kemesatho kirei a nei.

¹²⁸N kele zho se a phiyha pete chathaya, ketijü cha pete a mecü.

¹²⁹No khakeshü zhoko u ngo zo, süla a süko zeya.

¹³⁰N dieko hiekeshü ki kezie parya; süue kesikele pie miamomia tsüshüya.

¹³¹No chünukeshü zhoko menguketa la, a hapfhüpfhü tuoya.

¹³²Rürei a kitsa va di a ngumezhieshücie, no n neiyakezha zhoko gei chüshüyakecü tuoi di.

¹³³N die ki ze a phiyhako chü khrukhreshücie; mu ketho kemo bu a mho kuota hiecie.

¹³⁴Themia kepese nunu a shüphrashücie, a bu n thoko medzilieketuo la.

¹³⁵N zie peziepie n kituou gei shücie, sidi no rhükelie zhoko pie a pethashücie.

¹³⁶A mhidzüe kerü dzü mhie kru parte, n zho medzilie kemo la.

¹³⁷He-i Jihova, noe miatho, mu n cako mezhü.

¹³⁸No die khakeshüko ketho mu kemiatho nunu par.

¹³⁹A ngumvüko n dieko rükra moketa la; a nou meca pie a ziekejü chüte.

¹⁴⁰N die pelelie kesü die; n kituou süu khrieya.

¹⁴¹A we cü mu zhasemia zo; siüderei a n kele zhoko rükra mota mo.

¹⁴²N kemiathoe kechachie kemiatho, mu n zho sü ketho-u zo.

¹⁴³Kemezhiekecü mu keziekere a gei vorte; derei n diekhakeshüko a nei.

¹⁴⁴No khakeshü zhoko kechachie dietho, kesikele pie a tsücie, a rheilietuo.

¹⁴⁵He-i Jihova, a nou pete se n kieya, a pfhe khoshücie, no rhükelie zhoko a ze zotuo.

¹⁴⁶A n ki chaya; a kelaliecie, no khakeshü zhoko a medzilietuo.

¹⁴⁷Teiso mhodzü sie a khruohishünu n ki shieshü; a n die nu a kemerü khashü.

¹⁴⁸A teizeizha pete ze mo cozhü, no phrakeshü dieu medotuoü di.

¹⁴⁹He-i Jihova, n kekhrie rüdirüliya kemo ki ze a pfhe rünyüshücie; n kethocau ki ze a chü perheishücie.

¹⁵⁰Kesuopie a pechüyacüko penuo vorzhie; Uko n zho ze kepecie se tuo.

¹⁵¹Sirei he-i Jihova, no penuo ba zo, mu n diekhakeshüko pete ketho zo.

¹⁵²No khakeshü zhoko kechachie la chükeshü, a thiedzütho siliete.

¹⁵³A mezhieko rükra di a kelashücie, a n zho rükra mota mocü la.

¹⁵⁴A yakepie pucie, di a rhashücie; n die ki ze a chü perheishücie.

¹⁵⁵Kelakelie-e kerüzhüko la peciethorte, uko n zho-u pfhüyakemo la.

¹⁵⁶N kekhrie zhathor, he-i Jihova! N kethocau ki ze a chü perheishücie.

¹⁵⁷A kepechüko mu a ngumvümia kra phi, derei no khakeshü zhoko nunu a rüreitaya mo.

¹⁵⁸A mia se tuoyakecüko ngu a phou mehoute, kekreilamonyü ukoe n dieu medziya kemo la.

¹⁵⁹N kele zhoko kide a nei shiü le di, n ketseikevi ki ze a chü perheishücie.

¹⁶⁰N die peteu sü ketho zo, mu n kemiatho zhoko pete kechachie tuoya.

¹⁶¹Kedinuoko puoca kejü nu a pechüte, derei a melou we n dieko prei mu rhu tha zo.

¹⁶²A n dieu nu a neiya, mhakezha vakeliemia puo tuoi.

¹⁶³A ketijü ngumecü mu rütse; derei n zhoko we a nei.

¹⁶⁴N kemiatho zhoko la a khunhie va thenie n thezieya.

¹⁶⁵N zho u neiyakezhako noune u tshu ba; mu uko phi kemesü jü.

¹⁶⁶Jihova, a n kelakelie merüya, mu n diekhakeshüko chüüzeya.

¹⁶⁷A n zhapu dieko medziya; a süko khriethorya.

¹⁶⁸N kele zhoko mu no khakeshü zhoko se baya, a cha pete n mhodzüki ba.

¹⁶⁹He-i Jihova, a pfhephrakeshü bu n mhodzünu volieyi, n dieki ze kesikele pie a tsücie.

¹⁷⁰A kecha bu n mhodzünu volieyi; n dieki ze a zelie.

¹⁷¹A tie-e n tshetuo, noe n zhoko pie a pethakeshü la.

¹⁷²A meü n die pu kelituo; n die khakeshüko pete mezhü zocü la.

¹⁷³N dzie bu a kekhruohiu chücie, a n kele zhoko kedalieketa la.

¹⁷⁴He-i Jihova, a n kelakelie mengu, mu n zhoe a keneiu zo.

¹⁷⁵A bu rhei bacie, siro puo n tshelieketuo la; mu no khakeshü zhoko bu a khruohicie.

¹⁷⁶A jüketa tekuo puo tuoi rütsi tuote; n kituou pfhücie; a n diekhakeshüko rükra mota kemo la.