Read Angami Naga Chieliko 135 Bible Online

Chieliko 135 - Angami Naga bible

Chieliko 135

¹Nieko Jihova tsheliecie! Jihova zau tsheliecie, Puo tshelie, harie Jihova kituoko;

²Nieko Jihova kinu thayakezhako, u Kepenuopfü kedikiko nu thayakezhako;

³Jihova tshelie, Jihovae vicü la; puo za tshekecü tsali chüshülie, puoe tseiüvicü la.

⁴Jihovae puo thuo Jakob kedaliete, tsiu Israel pie puo vie chü pekreituoü di.

⁵Jihova zha zoücü, mu u Niepuu sü terhuo pete mhoücü, a sicü la.

⁶Jihovae mhakehoupuorei puo neiyakezhau chüya, teigei rei mu kijü nu rei, dzükezhako nu mu kesou pete nu rei.

⁷Puoe kijü kelako nunu mhoutsa pesieshüya, puoe teirü la tei kemelako chüshüya, puoe kinyikiko nunu teikhrie se vorshüya.

⁸Puoe Ijipt nu nuorieu biewa, themia mu khunuo donu rei.

⁹Harie Ijipt, puoe zasiko mu ungothoko ketsepie nie donu Faro gei, mu puo kituoko gei shüshü.

¹⁰Puoe seyie kekra pekawa, mu kedi kuo phikecüko dukhriwa.

¹¹Amorko kediu Sihon, Bashan kediu Og, mu Kanan nu kedirüvie pete;

¹²sidi uko kijü pie mia phruowa, puo themia Israelko phruowa.

¹³Harie Jihova, n za sü kechachie baya, harie Jihova, n za kerükrau thephou pete nu baya.

¹⁴Jihovae puo themiako ketsotuo, sidi ngukemezhie pie puo kituoko gei shüshütuo.

¹⁵Seyie kekreiko rhuo miarhiko sü suna rakachü zo; themia dzieü kechü zo.

¹⁶Süko u tie nyi, derei die pulieya mo; u mhi nyi, derei mha ngulieya mo;

¹⁷süko u nyieto nyi, derei mhapfhe siya mo, morei uko me nu uko keha jü.

¹⁸Uko chükeshüko rei süko mhie zo; süko peleyakezha kehoupuorei si zotuo.

¹⁹Harie Israel kikruko, Jihova tshelie! Harie Aron kikruko, Jihova tshelie!

²⁰Harie Levi kikruko, Jihova tshelie! Nie Jihova preiyakezhako, Jihova tshelie!

²¹Zion geinu Jihova tsheliecie, Jerusalem nu lhouyakezhako! Nie Jihova tsheliecie!