Read Angami Naga Chieliko 139 Bible Online

Chieliko 139 - Angami Naga bible

Chieliko 139

¹He-i Jihova, no a pfhü di a siliete.

²Noe a kebakelie mu a siekelie rei si; noe ratsa nu a noudo siya.

³Noe a phichako mu a zhüketsu phrü baya, sidi no a rüli pete site.

⁴He-i Jihova, a meü nu die vorlie kemonu rei, no si phreya.

⁵A sietsa rei a dzütsa rei no a yalieya, di n dzie pie a gei shüliete.

⁶Mhasi süko a ngothor, süu rükrie, a kho tsokeliepfü mo.

⁷N ruopfü kinu a kirapuo vo ta? Morei n mhodzünu nu a ta kirapuo vo ta?

⁸A teigei kho rei, no sünu ba; Sheol nu a zhü chülie rei, no sünu ba.

⁹A teikeso shü chüpfülie di dzükezha khieko nu lhou tuota shierei,

¹⁰sünu zorei n dzie thuo a chatha tuotuo, sidi n dzie n zatsa bu a theze tsalietuo.

¹¹“Kezeiu a zepfülie mu a khie a mhou kezieu zeitatuo” iya rei,

¹²N la we kezeiu rei zei mo, theva rei khinhie mhie zie zo; n la we kezei rei zie zocü la.

¹³A nouko rei n thuo chüshü; no a zuo va nu a rhishü.

¹⁴A n tsheya, kemerie mu u ngo phi di a chükeshü la, n mhatho sü u ngo dapfü mo, a süu si tou ba.

¹⁵Kepekhre nu a chükelie ki, kijü kesou nunu kethekhrü di a chükelie ki, n kinu a rhiu rei keviewa mo.

¹⁶A chü a phou rüchü tso kemonu, n mhi-e a ngu. A la teisozha phrüshü a ketsüko vor rei mo zo luocü nu, n leshüdau nu thupie phre tuota.

¹⁷Harie Kepenuopfü, n nouleko a la puoma re! Süko pete kesakeshü zhapie kedipfü chü ga?

¹⁸A süko phrütuoü ro, süko theshünyo ki kra, a cokesier ki, a n ze ba zo.

¹⁹He-i Kepenuopfü! No kerüzhüko geiwa mecie zo, süla nie thezie menguyakecüko a kinu tuotacie.

²⁰Uko n gei mha kesuo pu tuoya; n ngumvüko kemethuo nu n za seya.

²¹O Jihova, a n mecüyakecüko ngumecüya mo me? mu n ngumvü kesieko la a nou suoya mo me?

²²A süko ngumecü tseiya; a süko pie a ngumvümia chüya.

²³He-i Kepenuopfü, a pfhü di a nou sishücie; a dojüshücie, sidi a noudoko sishücie;

²⁴sidi kerüzhü[64] cha huo a nou tuo mo mo shi mehocie, sidi kechachie chau nu a cha thashücie.