Read Angami Naga Chieliko 143 Bible Online

Chieliko 143 - Angami Naga bible

Chieliko 143

¹A kecha rünyüshüyi, he-i Jihova, n nyie pie a mezhie rünyüshücie! N dietho mu n miatho nunu a pfhe khoshücie.

²N kituou ze ketsokecü nu le molieyi, n mhodzü ki we rhei ketuoko mia puorei miatho mo zocü la.

³Ngumvümia a whuo tuote; a kelhou vüpie kijü shü; a chüpie thiedzütho siaketako tuoi kezei nu a bu ba.

⁴Süla a ruopfü a geinu phisiate, a melou nu u mekeso chüte.

⁵A thiedzü teiko rükrashü; n mhatho pete le ba; n dzie mhathoko le medoshü.

⁶A dzie chapie n ki shüya, a ruopfü n mengu terhüya, kijü keso puo tuoite. Selah

⁷A pfhekho rükrishücie, he-i Jihova; a ruopfü thachüte. A kinu n zie kevieta hiecie, a thekhe nu keketako tuoita rei si lho mu.

⁸Khise a bu n kekhrie ngukemezhie rünyükelie chüshüyi, a n peleyakecü la: A bu vokezhü chau silieketuo chüshüyi, a a ruopfü pie n ki piesieshüzhücü la.

⁹He-i Jihova, a ngumvüko kinu a kelashücie; a kevielienu di a ta n ki vorzhie.

¹⁰A bu n medo-u chülieketuo a pethashücie; no sü a Kepenuopfü zocü la. N ruopfü vi zocüu bu a chatha ze kemezhü nu vocie.

¹¹He-i Jihova, n za la a chüperheishücie; n miatho la kemezhiekecü nunu a ruopfü ze parshücie!

¹²N kekhrie rüdirüli kemo nunu a ngumvüko dathewacie, sidi a ruopfü pechüyakezha khe pekawalie; a sü n kituocü la.