Read Angami Naga Chieliko 147 Bible Online

Chieliko 147 - Angami Naga bible

Chieliko 147

¹Jihova tsheliecie! Ketshe tsali chüpie Ukepenuopfü ki keshüe vicü la; sikecüe u nei, mu ketshe-e zivi.

²Jihovae Jerusalem chü piesieshüya; puoe Israel mia u kelhikewako pfhü kengulieya.

³Puo u melou proketako chü pevishüya, di uko rüzako phashüya.

⁴Puo themvüko phrüse baya, puo uko za se uko pete kieya.

⁵U Jihovae zha, mu kuothor; puo mhasi puo kela jü.

⁶Jihovae mia u sanyü kemoko piesieshüya; puoe kelhiecüko pie kijü tsuwaya.

⁷Jihova thezie di tsali chüpie puo ki shüliecie; Harp pepie Ukepenuopfü tshelie.

⁸Kimhouko pie tei zeshüyakezhau, kijü la teirü chükeshüu, kijüthouko gei nha pelhoukeshüu.

⁹Puoe nhachüko ca khashüya, shüzha nuonuo ruo keba la rei.

¹⁰Puoe gura kekuo puo neiya mo; takevimia rei.

¹¹Jihovae puo preiyakezhako, mu puo kekhrie rüdiya kemo gei chüsechü kezhako, puo neiya.

¹²Jihova tsheliecie, he-i Jerusalem! N Kepenuopfü tsheliecie, he-i Zion!

¹³Puoe n kharu seiko bie kemeteikeshü la, puoe japie n gei keba n nuonuo tsüshüya.

¹⁴Puoe noune[67] pie n rienu kebako tsüya; puoe thoulha kememhietho-u pie n ketshu chüshüya.

¹⁵Puoe puo die khapie kijü gei shüya; puo die-e ta vi se zo.

¹⁶Puoe tekuomie mhie pekrie khashüya, puoe thege pekrü kezapie mige tuoi shüya.

¹⁷Puoe mhachu tuoi prü peyieshüya; supuonie puo kemeku mhodzü thalie ta?

¹⁸Puoe die ketseshü di süko chü pezeshüya, puoe puo tei bu rükhrieshüya; mu dzü bu kru tsurya.

¹⁹Puo die pie Jakob pekieshüya, puoe rhükelie zho mu ahza khakeshüko pie Israel tsüshüya.

²⁰Puoe seyie kekrei gei hamhie chü mo; puoe khakeshü zhoko bu si rei mo. Nie Jihova tsheliecie!