Read Angami Naga Chieliko 18 Bible Online

Chieliko 18 - Angami Naga bible

Chieliko 18

²Jihova sü a tsiekrieu, a dahou, mu a shüphrakelieu: A Kepenuopfü, a tsiekrieu a puo gei rüzhükelieu, a zhüu, mu a kelakelie kiau, a kuda.

³A Jihova za kietuo, puo za tshe kesüu zo, sidi a ngumvüko kinu a kelalietuo.

⁴Kesia roko a whipfülie, keka dzü rüpfhüko a re vor.

⁵Sheol roko a phalie; kesia ciephrieko a chakhalie.

⁶A kemezhiekelie ki a Jihova kieshü, mu a Kepenuopfü ki kekhruo la shieshü. Puo rüsuoki nunu puo a pfhe silie; a shiekhouikeshüko puo nyie tso.

⁷Süki kijüu mele mu peta; kijüthou mvüdzeko rei mele mu rünieta, kekreilamonyü puonou meyieketa la.

⁸Puo nyhüki nunu mi khu sieta; mha kepeka miu puo me nunu par; süue ketsiemizhüko petushü.

⁹Puoe teiko teshü kerünuoshü nu kerlie: mu zeibouicü puo phizhükhro tuo.

¹⁰Puo Cherub puo gei pfülie di pruota; puo teikhrie süko geinu pruo vi se sietaya.

¹¹Puo kezei pie puo kewhe chü di puo houlie; puo kewhe puo houpfü kebako sü; dzükezei mu kimhou shüde-icüko zo.

¹²Puo mhodzüki keba kezieu nunu prü mu thezhü mi-e kimhou kesoukezeiko pfüpha par.

¹³Jihovae teigei nu tei bu seshü, mu kerükrietho-u puo pfhe phrashü.[6]

¹⁴Puoe puo theütsieko ketseshü, ru süko ta u thetsera vota, puo tei kemelashü di süko penyüwa.

¹⁵Sitse dzükezha dzüyieko ngu parta, mu noe kerhiekeshü ki, he-i Jihova kijüu mvüdzeko rei ngu parta, n nyhüki thesüu se mhekeshü la zo.

¹⁶Puoe peso geinu zo tsur, puo a chüpielie; puoe dzükezha nunu a teshü se parlie;

¹⁷Puo a ngumvü kuo secüu kinunu a kelalie, tsiu a ngumecüyakezhako kinunu rei zo: kekreilamonyü uko a ki kuothorcü la.

¹⁸Kepeka a ki kevor nhie uko a petsouta; derei Jihovae a yakepieu.

¹⁹Puo a ze vor thechü kemeya puo nu shü; puo a ngu puo neikelie la a shüphrashü.

²⁰Jihovae a kemiatho ki le di a zhakhra chü a tsü; a dzienie kemesa ki ze di a zha chüshü.

²¹Ae Jihova chako ze tuolie mu kerüzhü zho se di, a Kepenuopfü ze kepecieta mo.

²²Puo die khakeshü petekoe a mhodzü tuo zo, mu a puo zhoko khawa mo zo.

²³A puo mhodzünu mezhü tuolie, mu kejo nunu a thuo a kha krei pie balie.

²⁴Süla Jihovae a kemiatho ki ze, mu a dzienie puo mhi ki mesakecü ki ze di a zha chü lashü.

²⁵Diethokecümia gei diethoshücie, vi tseicümia gei vi tseishücie;

²⁶kemesamia ki, no n kemesa pie pekieshücie; kerüpfhimia ki, no rüpfhicü pie pekieshücie.

²⁷Noe rünuokecümia kelashüya, derei kemiakokezhako we bie kerünuowaya.

²⁸No a mitu petushüya; Jihova, a Kepenuopfüe a kezeiu chü pezieshüya.

²⁹N geinu ae rüpfhünuo puorei penyülietuo; a Kepenuopfü geinu ae prou cakha tselieya.

³⁰Ukepenuopfü we, puo cha vi tsei zo: Jihova phrakeshü die sü ketho tsei; puoe puo pelekezha khe zhüu zo.

³¹Jihova sie Ukepenuopfü supuo ba ga? Mu Ukepenuopfü kemo tsiekrieu kekrei supuo ba ga?

³²Ukepenuopfüe kekuo pie a chie phakeshüu; mu a cha chüpie khrukhrekeshüu.

³³Puo a phi chüpie chüzhie phi mhieshüya, sidi a bu a tha kerükrieko gei thalieya.

³⁴Puo a dzie bu terhü chülieketuo pethashüya, sidi a bounie bu merenyi theü galieya.

³⁵No n kelakelie zhü rei pie a tsüshü; mu n dzie n zatsa pie a phou sieshü, n kekhruohi pie a chü pezhashü.

³⁶Thechü kemeya puo pie a phikhro chapra chüshü; sidi a phi bu tsierhieta molie.

³⁷A a ngumvüko whuo vo di a uko tsolie; uko pekawa kemochie rürei la mo.

³⁸A uko bie khrülie, mu uko sielie kenjüta; uko te a phikhro tsute.

³⁹No terhü nu la kekuo pie a chie phashü; no a keperhiemia pie a phi khro shüwate.

⁴⁰No a ngumvüko bu rünoupie a tsü, a bu a ngu kemecüko pekawa.

⁴¹Uko shieshü, derei miapuorei uko kelakeshü jü: Jihova kirei shieshü zo, derei puo uko khoü lashü mote.

⁴²Süki a uko vütshiepie teikhrie nu nyophe mhie zowa; a chadiko nu nyoba tuoi uko pfhüwa.

⁴³No mia a perhieketuoko kinu a kelashü; no a chüpie seyieko tsüu chüwa: a u si tuo kemo themia kro puo a liechü.

⁴⁴Uko a pfhe sishü mumetha a die zetatuo: chazoumia u kepepfü a ki vor.

⁴⁵Chazoumia u nou thachüta, mu michie pe zo di uko kuda nunu par.

⁴⁶Jihova rhei ba! A tsiekrieu bu theja pfücie! mu a kelakelie Ukepenuopfü bu kerükrieu chücie.

⁴⁷A khe pukeshüu sü Ukepenuopfü zo; mu themiako penyüpie a khroshüshü.

⁴⁸Puo a ngumvüko kinu a kelashü; U, no a pie kerükriepie a petsouko mhoshüshü; mia kemvü kechüko kinu a kelashü.

⁴⁹Süla a n tshetuo, he-i Jihova, seyieko donunu a n za ketshe tsali chütuo.

⁵⁰Kuokelie kezha puoe pie puo kediu tsüya, mu rüdi kemo pie puo kenhekelieu tsüya, kechachie David mu puo se puo yieko la.