Read Angami Naga Chieliko 19 Bible Online

Chieliko 19 - Angami Naga bible

Chieliko 19

¹Teikoe Ukepenuopfü zayie pesishü; mu teimeluoe puo dzie mhatho thashüya.

²Teisoe teiso ki diepu; mu teizei-e teizei ki mhasi thashü.

³Die pu chie mo, u die jü, uko pfhe rei si mo.

⁴Sirei uko pfhe kijü pete rhüpfü vote, mu uko die kijü kela ketso vote. Teiko geinu[7] puoe niaki la pfheki puo pethoushüte.

⁵Süu yasaue puo kibou nunu kepar tuoi, kekuomia u nei di ta ketuo tuoi.

⁶Puoe teigei puo kela nunu parzhie, mu puo kewhi thelako ketso; mu mhapuorei puo keleu nunu keviekelie jü.

⁷Jihova zho sü vi lotso, u chü perheishüya, Jihova zho-ue ketho, miaümia chüpie mhasilieya.

⁸Jihova keleko mezhü, thenou kenei khashüya: Jihova diekhakeshüko mecümecie, themhi chü pezieshüya.

⁹Jihova keprei-e mesa tsei, kechachie ba seiya: Jihovae zho khakeshüko ketho mu puotou phre.

¹⁰Süko suna kirei se morosuokuo, u, suna kevitho kirei; mepfhidzü kirei mou, mu mepfhidzüda nunu po ketsurko kirei moukuo.

¹¹Süko geinu n kituo-ue u kirilieya, süko se bakelie nu zhakhra kezha ba.

¹²Supuonie süko kekrücü silie vi ga? Kepekhre kejokemouko nunu a chü kemesashüya.

¹³Yalie mo di kephoumako kechü nunu n kituou kha se balieya;[8] süko bu a mho kekhata hieyi. Sitse a gei thetha jütatuo, mu kejo kezhako nunu a jo mo tuolietuo.

¹⁴A tie nu dieko, mu a melou kelekemedoko bu n mhodzünu lielie kesü chücie; Jihova, a tsiekrieu mu a rhakelieu.