Read Angami Naga Chieliko 22 Bible Online

Chieliko 22 - Angami Naga bible

Chieliko 22

¹A Kepenuopfü, a Kepenuopfü, no kiüdi a khawata ga? No kiüdi a khruohi mo mu a meheimelokecüko nunu pecieta ga?

²He-i a Kepenuopfü, a khinhie gei melieshü, derei no a pfhe si mote: tsiu theva gei rei derei kerüü ngulie mo.

³Derei no we mesa, Israel ketshe n gei bakezhau.

⁴Hie puonuoko n pele; uko pelelie, mu no uko kelashü.

⁵Uko n kielie, di uko kelalie; uko n pelelie, mu uko bu kemengata mo.

⁶Derei a we zochü puo zo, themia mo; mia krenyü chü mu mia bu a pese.

⁷A kengu pete a krenyü, uko u tielhi a kie mu tsünge di pucü;

⁸“N dzeu pie Jihova ki shüshülie, puo bu n kelashücie, puo bu puo noulieu kelashücie” siya.

⁹Sizoürei noe nuobvü nunu a se parshü; noe a zuo merü gei a pekru se bashü.

¹⁰A penuokelie nunu a pie n gei balie; a zuo a penuokeshü nunu no a Kepenuopfü zo.

¹¹A kinu pecieta hie-i, kemezhiekecü a penuo ba, mu kekhruohiketuo puorei jü.

¹²Thudo kekra a houpfüliete: Bashan nu thudo kekuoko a houliete.

¹³Uko u tie gapie a rü ba, puo chüte pfhü di mehoketuo Losha tuoi.

¹⁴A we perukewa dzü tuoite, a ruko pete a kereko ze ba kemo tuoite; a melou mepfhibuo tuoite, süu a merü nunu zete.

¹⁵A tie sopie litso mhiete; a meü a meco kupfü bate; mu no a khapie kesia nyophe nu zhü.

¹⁶Tefüko rei a houpfü ba; kerüzhümia kro puo a houpfüliete; A phi a dzieko rüwite.

¹⁷A ruko pete phrülie vite, uko meho mu a phi terüpfü tha.

¹⁸Uko a pfheneiko kezalie, mu a pfheneiko pie dapewa.

¹⁹Derei no we a ki pecieta hieyi, he-i Jihova, a kekhruou, rükri vor a khruohishücie!

²⁰Zhiecha nunu no a kelhouu kelaliecie; tefüu kekuo nunu a kerheiro-u[9] kelaliecie.

²¹Loshau tie nunu a kelaliecie! Tsiu thudo kekhrieko kia nunu a kelashü[10].

²²A siezedzürieko[11] ki n zau pie pesishütuo; kehouu nunu a n tshetuo.

²³Nie Jihova kepreiko puo tsheliecie; nie Jakob tsiako pete, puo za chü kemeyieliecie, siro Israel tsiako pete, puo ngupie nie ngoliecie.

²⁴Puoe kemezhiekezhau mezhie mecü morei rütseta mocü la; a kinu puo zie rei kevieta mo; derei puoe puo kiekeshü ki a pfhe rünyülie.

²⁵Krodi kehou kezhau nunu a n tshetuo; puo preikezhako mhodzünu nu a die phrashütuo.

²⁶Ketsopfümia mhacü di u kelhuo chülietuo; Jihova kepfhüko puo tshetuo; nie melou bu kechachie rheituocie.

²⁷Kijü kela nu ketuo pete rükralie di rürei Jihova kitsa vatuo; mu seyie nuolhou pete puo mhodzü rüsuotuo.

²⁸Kedi kechü sü Jihova vie zo; mu puo seyieko mho di baya.

²⁹Kijü nu zeyakezha[12] pete puo[13] rüsuotuo; nyophe nu ketsu pete puo mhodzünu nerhu phretuo; mu a puo la rhei batuo.

³⁰Siekelhoumia puo rüsuotuo; thephou puoe Jihova dze pie phou kekreiu ki putuo.

³¹Mu penuo vor moluocüko ki puo dze pie shietuo, puoe chüshüketako dze.