Read Angami Naga Chieliko 28 Bible Online

Chieliko 28 - Angami Naga bible

Chieliko 28

¹A n kieya, harie Jihova, a tsiekrieu, a pfhekho mota hieyi: noe zeitatuoü ro, a bu thekhe nu leketako mhie zotuo.

²A mezhiemelokeshü rünyüshücie, n kekhruohi mengu di chazhie, a a dzie yhapie n kemesa rüsuokitsa[16] va di.

³A teshüpie kerüzhüko sawa hiecie, mu mha kesuo chüyakezhako, u zanuoko ki kezekevi we pu, derei uko melou nu mha kesuo bacüko ze kesalieta hiecie.

⁴Uko mhatho kheki sü chüpie uko tsücie, uko mhatho kesuoko ki ze, uko dzie-e chükeshü ki sü ze di ukoe ngulie kesüu chüpie uko tsücie.

⁵Kekreilamonyü ukoe Jihova mhathoko, morei puo dzie mhathoko rünyüya mo, puoe uko pekawatuo, mu uko piesie lashü lho.

⁶Jihova bu thetshe kepfüu chücie, kekreilamonyü puoe a kecha pfheu rünyüliete.

⁷Jihova sü a kekuo mu a zhü zo, a noue puo peleya, mu a khruohilietaya, sidi a meloue puo neithor ba; mu a tsali se puo thezietuo.

⁸Jihovae puo themiako kekuou zo, mu puoe kenhekelieu la kelakelie kudau zo.

⁹N themiako kelashüliecie mu japie n seyieko tsücie; uko kepfheu chüshücie; mu kechachie uko pietuocie.