Read Angami Naga Chieliko 31 Bible Online

Chieliko 31 - Angami Naga bible

Chieliko 31

¹Jihova, a n pele tuo zotuo; a bu mhakipuorei thenga chüta hiecie; n kemiatho nunu a shüphraliecie.

²N nyie kedeipie a tsücie; a shüphra mhaishücie. No a keya tsiekrieu chüliecie, a kelaketuo la dahou kemetei puo chülie.

³No a tsiekrie mu a dahouu zo; n zau la a shüta mu a chathalie.

⁴Mia pekhre di a malieketuo kebie chüpie keba nunu a teshü pashücie; no a keyaucü la.

⁵A ruopfü khapie n dzienu shüya, noe a rhaliete, Jihova, kedietho Kepenuopfü.

⁶Ae puoma kejü terhuorhi le pevikecü ngumecüya; derei a we Jihova pele zotuo.

⁷No mia ngukemezhieu nunu a nei mu a noumvütuo, no a mezhieu ngushüketa la, no a mezhieko silieketa la.

⁸Sidi a khapie ngumvümia dzienu shüwa mo; no a phi khapie thechü kemeya puo nu shüshü.

⁹Harie Jihova, a ngumezhiecie, a kemezhiekecü nu baketa la; a mhi-e nousuo la thachüte, a ruopfü mu a mo rei sa.

¹⁰Nousuo nunu a kelhou pevowatazhie, mu a teicieko meheimelokecü nunu; a kemengakecü nunu a kekuo jüte, mu a ruko rei thachüte.

¹¹A ngumvüko krenyü chütazhie, a siezanuoko mhodzünu kemerie chü zote; a khriethokhriechüko bu a ngupie preite, cha nu a kenguko tataya.

¹²A siele jüte, kesiamia tuoite, ae litso puo mhiete.

¹³Kenupukecü die si phi vor ba, kemichie dze rübei! Uko a petsou di mharhü, a kerheiro liewatuoü di rhü.

¹⁴Derei a n peleya, he-i Jihova! A puya, “No, a Kepenuopfü zo.”

¹⁵A teiko n dzie nu ba zo; a ngumvüko dzie nunu a kelaliecie, tsiu a whuoketuoko kinu rei.

¹⁶N zie bu n kituou va pezieshücie; a pie n kekhrie rüdirüli kemo nu baliecie.

¹⁷A bu thenga chüta hie, he-i Jihova, a n kieshüte eru; kerüzhüko bu thenga chülie, uko bu Sheol nu kemekrie zhütalie.

¹⁸Kemiako, mia pese, mu menga mo di kemesako thayakezhamia bu zeitacie.

¹⁹N kevi-e kide zha shi! Süu n khrü preiyakezhamia la kengupie zhüte, süu n rüzhü di lhouyakezhako la themia pete mhingu nunu chüshü.

²⁰No themia kethedokecü nunu uko pie n khrükhro shülie; themia panyakecü tie nunu uko pie n khrükhro balie.

²¹Jihova bu thetshe kepfüu chücie; miae re keba nadi puo tuoi, a re kevor ki, puoe u ngo zokecü rüdi kemo kekhrie se a gei chüshü.

²²Ae a kemeyhu pfü di sie, “N mhingu kinu a whuo petsewate[20]” isiwa. Derei a n kiekeshü ki no a kecha pfhe rünyülie.

²³Harie Jihova khrieliecie, puo kemesako pete, Jihovae puo pelekezhako pesepie balieya, siro kemiako di mhachüyakezhako zhakhra chü tseishüya zo.

²⁴Metei mu nie melou bu thepfu ba zolie, nie Jihova merü tuoyakezha pete.