Read Angami Naga Chieliko 33 Bible Online

Chieliko 33 - Angami Naga bible

Chieliko 33

¹Jihova nie neiliecie, harie kemiathoko. Ketshe-e kemezhümia vazhüe ru,

²Kithar se di Jihova tshelie, puo rhü ker kenyi übou pfü se di tsali chüpie puo ki shülie.

³Tsali kesa kelipie puo ki shülie, übou khou si se di chü petoshülie.

⁴Jihova die-e mezhü zocü la, mu puo mhathomhachü pete-e ketho nunu chü phre zo.

⁵Jihovae kemiatho mu kethoca puo neiya, kijüue Jihova kekhrie rüdirüli kemo thuo tshupfü ba.

⁶Jihova die üse teiko chülie, mu puo thesüu pie sünu ketuo krodi pete chülie.

⁷Puoe dzükezha nu dzüko kengupie dzübouko nu shükewa mhiewa, mu kesouko khapie mhanyabou kiko nu shüwaya.

⁸Kijüu pete bu Jihova preiliecie, kijü nu kelhou pete bu puo prei puo rhu thaliecie.

⁹Puoe pushü, mu süu chülie ize ru, puo die khashü ru, süu metei thata zo.

¹⁰Jihovae seyie mharhü biepie kemethuo chüwaya, puo themia mharhü bie ketsiesiewaya.

¹¹Jihova mharhüko kechachie baya, puo nouleko rei thephou pete tuo.

¹²Jihova pie puo Kepenuopfü chükelie seyieu thejakepfümia zo, puo kayie chütuoü di puoe kedakelie themiako rei zo.

¹³Jihovae teigei nu mha mehoya, puoe themia nuonuoko pete nguya.

¹⁴Puo kebachü nunu puo kijü nu lhou keba kheko.

¹⁵Puo uko melou pete rhishüya; puoe mhatho pete meho ba.

¹⁶Kedimia puorei rüpfhünuo krodi la krulieya mo, kekuomia puorei kekuo kezha la krulieya mo.

¹⁷Krulieketuo la we gura zo rei kemethuo zo, morei puo kekuo kezha üse puo kelashüketuo jü.

¹⁸Harie, Jihova mhi-e puo preiyakezhako, mu puo kekhrie rüdirüli kemo merü tuoyakezhako gei baya.

¹⁹Kesia nunu süko ruopfü kelashütuoü, mu pekriekecü nunu sümia perhei se balieketuo la.

²⁰Hie ruopfüe Jihova khre merü ba zo, puoe hie kekhruo-u mu hie zhüu zo.

²¹Hie puo za kemesau pelekezha la hie noue puo geinu hie neiya.

²²Jihova, hie-e n merü tuoya, n kekhrie rüdirüli kemo-u bu hie gei baliecie.