Read Angami Naga Chieliko 34 Bible Online

Chieliko 34 - Angami Naga bible

Chieliko 34

¹A puotei pete nu Jihova tshe tuo zotuo; puo ketshe sü a tie nu tuo sei zotuo.

²A ruopfü Jihova nunu puo mholie chütuo; thenou kerünuoko süsü si di u neituo.

³Harie, a ze Jihova chü pezhaliecie, sidi uko keze puo za chü kemeyie khe.

⁴A Jihova pfhü, ru puo a kecha kelashü, sidi a michie peteko nunu a kelalie.

⁵Puo meholie di zielie, sidi nie zieko mhakipuorei mengata molie.

⁶Mhakejü hau melieshü ru Jihova puo pfhe silie, sidi puo mezhie peteko nunu puo kelashü.

⁷Jihova dielieue puo khrüpreiyakezhako khieümhou houpfü ba di sümia kelashüya.

⁸Metha di Jihovae viücü siliecie: puo gei rüzhükeliemia thejakepfümia zo.

⁹Jihova preiliecie, puo kemesako, puo preiyakezhamia tsopfhütalie lho.

¹⁰Losha nuonuoko rei tsopfhü di merüya, derei Jihova pfhüyakezhamia we tsopfhütalie lho.

¹¹Vorlie, nhicuko, di a pfhe rünyüliecie; Jihova khrüprei pie nieko pethashütuo.

¹²Nie supuoe kerhei menguya, mu teisozha kekra rhei ba di mha kevi ngu nyüya ga?

¹³Mha kesuo nunu u meü kekhalie, mu ketijü kepu nunu u tie kekhalie.

¹⁴Kesuou nunu talie, di mha kevi chülie; nouneu pfhülie, süu whuo zo volie.

¹⁵Jihova mhi-e kemiathomia gei baya, mu puo nyie süko pfhe rünyü baya zo.

¹⁶Jihova zie-e mhakesuo kechümia petsou baya; uko kerükrau bu kijü nu ba motaketuo la.

¹⁷Kemiathomiae kekhruo chakeshü ki, Jihova silieya; sidi u mezhie peteko nunu u kelashüya.

¹⁸Jihovae u melou bietshebietshakeshümia penuo baya, sidi thedzüzei ketuoko kelashüya.

¹⁹Kemiathomia rei kemezhiekecü kra phi; derei Jihovae süko pete nunu puo kelashüya zo.

²⁰Puoe uko ruko pete pekrushüya; süko puorei tseütsalie lho.

²¹Kesuo-ue kerüzhüko gei kesia se vorshüya; mu kemiathoko mecükezhamia pejotuo.

²²Jihovae puo kituoko kelalieya; puo rüzhükeliemia puorei bu jotalie lho.