Read Angami Naga Chieliko 38 Bible Online

Chieliko 38 - Angami Naga bible

Chieliko 38

¹Harie Jihova, n nei kemo nunu a kerhie hieyi; morei n noupfhünouyie nunu a pechü di petha hieyi.

²N theütsieko a gei lete, mu n dzie a negetsapfü ba zo.

³N nouyie la, a mo shürho ba mote, a kephouma la a ruko nu rei keshürho ba mote.

⁴A kejokemouko a tsü gei vote; thepie kemesi puo tuoi uko a la mesithorte.

⁵A kenya la a rüzapfüko ciepie kerütse chüte.

⁶A rühou tsute, a zerepfü tsu zhüte, a zhate krate.

⁷A dobo nu a the bate; a chü gei kemene puorei tuo mote.

⁸A thachü mu tseütsate, a nou meheimelocü la a bu ruorüite.

⁹He-i Niepuu, a kemengu pete sü n mhodzünu ba; mu a meheimeluocüu rei n kinu pekhrewa mo.

¹⁰A melou toutoui mu a kekuo jüte, mu a mhi kezie zorei a kinu tuote.

¹¹A khrieko mu a zeko rei a kechü la petsete; a zanuoko rei petse nu thate.

¹²A kerheiro pfhü ketuoko a la kebie pethoupie ba; mu a pechütuoü ketuoko mha kesuoko pu tuote; tsiu zhate kecürü do le baya.

¹³Derei nyievümia tuoi a mhapfhe siya mote, mu die pulieyakemomia tuoite.

¹⁴Ketho, a mia pfhe siya kemomia tuoite, mu mia die kelaya kemomia tie tuoite.

¹⁵Harie Jihova, a n pfhe baya, he-i Niepuu, a Kepenuopfü, no a die kelashütuo.

¹⁶Süla a chaya, “A bu uko nei krawa hiecie, a cierhiekelie ki u neiyakezhako bu.”

¹⁷A krüta nyünuo ba, mu a nou kesuo a mhodzü ki tuo zo.

¹⁸A a kejokemou phrashü, a kephoumae a keyhukezhiete.

¹⁹A ngumvüko rheirhiei mu kuo; mu puoca kejü nu a mecüyakezhamia kra sete.

²⁰Mha keviu la kesuo chüshüyakezhako rei a ngumvümia zo, ae viücüu medziyakezha la.

²¹A khawa hiecie, he-i Jihova, a Kepenuopfü, a kinu pecieta hieyi.

²²Kenourhei sier a khruohicie, he-i Niepuu, a kelakelieu.