Read Angami Naga Chieliko 39 Bible Online

Chieliko 39 - Angami Naga bible

Chieliko 39

¹A pushü, “A a chako nu menuolietuo, sitse a meü se phoumawa molietuo; kerüzhümia a mhodzü ketuo ki, a guratiekha puo pie a tie kekhalietuo.”

²A melie mo mu zei ba, kemekrie ba zorei, süla vilie mo; mu a nousuou rekuota.

³A melou a nou nu le parta; a mhale keba ki miu tu parta, sitse a meü die pushü.

⁴“He-i Jihova, a bu a thelau silieyi, tsiu a teisozhako kichiepuo shicüu; a kelhou kidepuo ta vi shikecü a bu siliecie.

⁵Harie, no a teisozhako chüpie pfü puo dewate, mu a kelhouzha rei n mhodzüki we mhapuo mo zo. Ketho zo, kehoupuorei hakeshü puo zie mo. Selah

⁶Ketho, themia ha mhakhrü puo kemhie zo; uko kemethuo puo nu meyhumezhie tuoya zo, puo kinyi pfhepie ba, sirei supuoe süko pielietie shi siya mo.

⁷“Siro Jihova, a bu kedipuo pfhe sata? A kemerü sü n gei bacü zo.

⁸A kejokemouko pete nunu a kelashücie; a chüpie kenyako krenyü puo chü zowa hiecie.

⁹A kemekrieta, a tiegashü mota; no n thuo pie siwate ru.

¹⁰A kinu no a vükecüu chüwatacie; n dzie a vücüko[23] la a tuo motazhie.

¹¹“Noe themia puo kejokemou la puo kerhie mu pethashüya, siro shülhe-e cüwayakezha tuoi noe puo kinyi cü pejüwaya; ketho zo, themia kehoupuorei hashü kevi puo phre hu zo. Selah

¹²“A kecha rünyüyi, harie Jihova, mu a kekra rünyücie, a mhidzüu gei kemekrieta hiecie. A we n mhodzünu solhimia; mu solhimia puo zocü la, a puonuoko pete tuoi.

¹³A lhieshücie, a bu a nei lalieketuo la, a tuota mu jüta kemonu.”