Read Angami Naga Chieliko 40 Bible Online

Chieliko 40 - Angami Naga bible

Chieliko 40

¹A shügeshühiepfü di Jihova pfhelie, ru puo a kitsa va vor di a pfhe rünyülie.

²Puo thekhe kemeriekecü[24] puo nunu a teshü siershü, nyoba bobokecü nu, sidi a phi pie tsiekrie puo gei pethalie, mu a kevokevüko keseshü.

³Tsiu puo tsali kesa puo pie a tie nu shüwate, úko Kepenuopfü ketshe tsali; themia kekra süu ngu di michietuo, mu Jihova pelelietuo.

⁴Jihova pie puo kepele chükeliemia, tsiu kemiakokecüko kitsa va kemoko, morei terhuo ketho kemoko kitsatie vota kemomia thejakepfümia zo.

⁵Jihova, a Kepenuopfü, no mha kekra chüshü, mu hie gei ungomhatho mu n noudonouleko rei sa; miapuorei se n ze kemejükeliepfü mo. A bu süko puphrapie pesishütuo ürei, süko phrü kekralie lho.

⁶Ruosuo mu mhakhakeshü noe menguya mo; no a nyie khrüshüwate; kethe ruosuo mu kephouma ruotho, noe cha mo.

⁷Sitse a pucü, “Harie, a vorte: leshüda tshüu nu a dze thupie zhüwe.

⁸Harie, a Kepenuopfü, a n medo chücü a nei, mu n zho-u a melou nu bate.”

⁹A mechü kehou kezha nu kemiatho dze pie zhapu chüshü; harie, a a tie kekha mo; Jihova no si ba.

¹⁰A n mezhü pie a melou nu keviewa mo; a n kemiatho mu kelakelie pu pesishüte; a krodi kehou nunu n kekhrie ngukemezhie mu ketho pekhrewa mo.

¹¹N kekhrie kemeneu a kinu khawa hiecie, he-i Jihova, n kekhrie ngukemezhie, mu n ketho bu a pekruse sei tuolieyi.

¹²Phrü huliekelho mha kesuo a houpfü bacü la, a kejokemouko a khapfülie di, a bu tosie meho reilie kenjüte; süko a tsü gei thako ki krakuote; mu a melou rei thachüte.

¹³Harie Jihova, n nei di a kelashücie; a khruoketuo la kenourheicie, Jihova.

¹⁴A pekatuoü pfhü ketuoko bu thenga chü mu kebvükerhütacie; a pechü kezha u neiyakezhako bu tsiesieta mu thenga chütacie.

¹⁵A kre di, “Ha! Ha!” ituoyakezhako bu menga di thedzükekou chütacie.

¹⁶N pfhüyakezha pete bu n geinu u neilie mu u dzüzielie, n kelakelie u neiyakezhako bu, “Jihova bu kemeyieu chücie!” icü pu sei tuo zolie.

¹⁷Derei a we mhajü mu tsopfhü, sirei Jihovae a va rükraya; no sü a kekhruou mu a kelakelieu zo: rüge bata hiecie, harie a Kepenuopfü.