Read Angami Naga Chieliko 42 Bible Online

Chieliko 42 - Angami Naga bible

Chieliko 42

¹Chüzhie-e krukezhü rücü dzü menguyakezha tuoi, a ruopfü rei n mengu kelhoyawe, harie Kepenuopfü.

²A ruopfüe Ukepenuopfü mengu di terhü tuoya, rheiketuo Kepenuopfükecü la, a bu kicükipuo Ukepenuopfü mhingu nu vor thalie ta?

³A mhidzüko pie teisoteizei rei a ca chü bate; sirei uko zhate a üse, “N Kepenuopfü kirapuo ba ga?” isiya.

⁴A hako rükrakeshü ki, a ruopfü rushü, a themia kro-u ze vo zo, a uko ze Ukepenuopfü kinu vo, kenei mu ketshe pfhe chü dinu, u kenei teiso chü keba krodi puo ze di.

⁵Kiüdi n thesuoya mu? Harie a ruopfü; tsiu kiüdi a nou nu rüleilie mo ba ga? No Ukepenuopfü khre merü zolie; a we puo tshe zotie ru, puo kekhruohi zieu la.

⁶Harie a Kepenuopfü, a ruopfüe a nou nu puo thesuo siei bate; süla a Jordan mu Hermonko kijü nunu n rükralie, siro Mizar kijüthou nunu rei zo.

⁷N dzükevoko pfhe nunu kesoue kesou kie; n dzü kerüpfhüko, mu dzü kerütheko pete a mho vote.

⁸Sirei Jihovae khinhie gei puo ketseikevi khashütuo, tsiu theva gei puo tsali a ze balietuo, mu a kechau pie a kerheiro Kepenuopfü ki shü.

⁹A Kepenuopfü a tsiekrieu ki putuo, “No kiüdi a rükra mota ga? A ngumvümia a kepese la a bu kiüdi kra zo tuotieya mu?”

¹⁰Kesia shie rüza puo a gei keba tuoi a ngumvüko a kerhieyie; uko teisonhie a ki, “N Kepenuopfü kirapuo ba ga?” isi baya zo.

¹¹Kiüdi n thesuoya mu? Harie a ruopfü; tsiu kiüdi a nou nu rüleilie mo ba ga? no Kepenuopfü khre merü zolie; a we puo tshe zotie ru, puo a kekhruohiu mu a Kepenuopfü zo.