Read Angami Naga Chieliko 44 Bible Online

Chieliko 44 - Angami Naga bible

Chieliko 44

¹Hie hie nyie pie siliete, he-i Kepenuopfü, hie puonuoko no thiedzütho uko teiki mha kicüpuo chüshü shicü, hie ki pushüe:

²No seyieko n dzie pie whuowa, mu uko pelhoushü, no themia kekreiko pechüwa, di uko whuo petawa.

³Uko thuo uko zhiecha üse kijüu pevielie mo, morei uko boue uko kelashü mo zo; derei n dzie n zatsa mu n boue, tsiu n zie kezie thuo zo, no uko khrieketa la zo.

⁴No sü a kediu zo, harie Kepenuopfü; Jakob la kelakelie pushücie.[26]

⁵N geinu hie ngumvümiako khukhrüwatuo; n zau geinu hie petsoukesierko kedewatuo.

⁶A a theü pelelie lhocü la, a zhiecha rei a kelalie lhoe ru.

⁷Derei no hie ngumvüko kinu hie kelashüte, mu hie mecüyakezhako bu thenga chüliete.

⁸Ukepenuopfü nunu hie zhate mholie tuoya, mu kechachie n za tshe tuo zotuo, Selah

⁹Derei no we hie khawate, sidi hie pie kethesewate, mu hie rüpfhünuoko ze tuoprashü mote.

¹⁰No hie bu ngumvümia kinu rünouketa chüte, tsiu hie mecüyakezhako thuo mhavaliete.

¹¹No hie bu tekuo dukhripie mia ca chütuoü baketako tuoiwate, sidi hie bu seyieko donu kezakezi tuote.

¹²No puoma mhathokemo nunu n themiako zewate, uko mau pie n kinyi chü pekralie mo.

¹³No hie bu hie siezanuomia thapfüte, hie khie hie mhou kebako bu nu pese mu krenyüketuo puo chüwate.

¹⁴No hie chüpie seyieko dzeüse puo chüwate,

¹⁵A ngae zhate a mhodzüki baya zo, kemenga thuo a zieu zepfü tuote;

¹⁶mia medophi mu mia pesekezhako; ngumvüu mu khepu lieyakezhako mhodzüki.

¹⁷Hako pete hie gei vorte; siürei hie n rükra mota mo, morei hie n dietseidiekho-u gei dietho mota mo,

¹⁸Hie nou rüdita mo zo, morei hie phichako rei n cha nunu lata mo zo.

¹⁹No meseru tuoko chü nunu hie bietshawa, tsiu kesia khrü bu hie soupfüliete.

²⁰Hie Kepenuopfü rükra mota üro, morei hie dzie yhapie terhuo kekrei tsüta ürei,

²¹Ukepenuopfüe haha silie motatuo me? puoe mia nou kepekhreko siyacü la.

²²N la mia bu zhate hie dukhri, tekuo dukhrituoü baketako tuoi hie phrülie.

²³Coliecie, he-i Jihova, no kiüdi zezhü zo ga? Sieliecie! Kechachie hie khawa hiecie.

²⁴Kiüdi n zie kevielie, mu hie mezhieko tsiu hie kepeseko rükra mota ga?

²⁵Hie rükre nyophe nu tsuzhüte, hie mo kijü kupfü zhüte.

²⁶Sielie di hie khruohishücie, sidi jütalie kelho n kekhrieu se hie rhashüyi.