Read Angami Naga Chieliko 45 Bible Online

Chieliko 45 - Angami Naga bible

Chieliko 45

¹A noue mha kevi caü bu puo tshu ziepfü zhü; ae kediu la zopie kebako pushüzhie; a meü sü leshü thu kesimia puo kethusei zo.

²Themia nuonuoko donu noe kezivitho; ngukemezhie rupie n tienu shüwate; Süla Ukepenuopfü kechachie japie n tsüwate.

³N zhiecha pie n do gei khelie, Zayie mu mesümedekecü se di.

⁴Ketho-u la, kemezhü rüguo[27] ketuo la, n kezha nu tuo zo volie; n dzie n zatsa pie mha kemeriekecüko chü pekieshü.

⁵N theütsiekoe kediu ngumvüko melou zepfü ba; themiako te n khro tsutaya.

⁶Harie Kepenuopfü, n kediba sü telhekechachie tuoyawe; n kedi theue kemezhü thewe.

⁷No kemiatho n nei mu kerüzhü mecüya. Süla Kepenuopfü, n Kepenuopfüe kenei tier se n kenhe pie n kromia mhoshüwate;

⁸N pfhenei pete-e mür, mu aloe mu cassia re zo, tsohu pie kechü kedi kiko nunu puorhü kechü üboukoe n nou chü pemvüshü.

⁹N ki nu thenu therhuko donu kedimia nuopfüko sa, n zatsae Ofir nu kedipfü suna se di thaya.

¹⁰Rünyüshücie, harie rüüpfü, sidi leshü mu n nyie kedeishücie; n themia mu n puo ki rükra motalie;

¹¹Sitse kediu n zivi mehoutatuo; puoe n niepuu ze ru, mu no puo rhulie.

¹²Siro Turmiakoe[28] mha se n nei chütuoü vortuo; kenyithoko rei mha neiü se,

¹³n nei chütuoü vortuo. Suna se dokecü rütso pie puo ropfü di kediu nuopfü puo kibounu ba.

¹⁴Puokhu neiü pie kethu pfhenei se di ze kediu ki votuo; puo dziese rüü phouseko, süsienu puo zakroko bu puo ze n ki vortuo.

¹⁵Thenoumvü mu u nei siei di ze votuo; uko bu kediu kiu nu letuo.

¹⁶N puonuoko mese nu n nuonuoko bu thatuo, noe uko bu kijü pete nu kedimia nuonuoko chütuo.

¹⁷A n za chüpie thephou pete bu rükraketuo puo chüshütuo; süu la themiako telhekechachie n tshetuo.