Read Angami Naga Chieliko 49 Bible Online

Chieliko 49 - Angami Naga bible

Chieliko 49

¹Themia peteko, nie hau rünyüliecie; kijüu nu lhou ketuo peteko, nie nyie kedeishücie.

²Kerünuou rei, kerükrieu rei, kenyiu rei, kejüu shierei kemhie zo.

³A tie-e mhakesi dieko putuo; a nou mha kemedo rei mha kesikele nu zotuo.

⁴A a nyie kedeipie mhasi rünyütuo, a mhasi kesau pie übou geinu vatshashütuo.

⁵Kiüdi puotei kesuo ki a michieta ta? Kerüzhümia a kepechüko a houpfükelie ki,

⁶u kinyi pelekezhako, u kinyi kekra kebako se kemelhaya mu?

⁷Miapuorei puo thuo puo kerheiro[30] rhakelie jü zo, morei rhakelie ma pie Ukepenuopfü tsülie kenjü zo!

⁸Kerheiro rhaketuo mae re ze ru, süu mhapuorei chü di tsokelie jü.

⁹Sidi puo bu kechachie rhei tuolieketuo, mu mekhru[31] ngu molieketuo la.

¹⁰We mhakesimia ngukecü, uko rei siataya; kenyau rei, puo mhasi kejüu rei keze kataya, di u kinyiu kekreimia dzie nu votaya.

¹¹Uko noule ki zo we, uko kiko kechachie ba tuoüya, mu uko kebachüko rei thephou pete gei votuoü le, kijüko pie uko thuo uko za nu thoya.

¹²Derei themia keviko ba sei zolieya mo; puo rei katayakezha nhachüko mhie zo.

¹³Haha ze, kenya thepfu chü kebako dze sü hai zo; u thuo u le u nei kebako rei si zo. Selah

¹⁴Sheol nu shüwaketuo la tekuo tuoi uko kedaliete; kesia bu uko kepfheu chütuo, sidi ukoe mezhü mekhruu nu tsutatuo, uko rhiko jütatuo, Sheol-e uko kebachü chütuo.

¹⁵Derei Ukepenuopfüe Sheol kekuo nunu a rhalietuo; puo a zelie zotuocü la. Selah

¹⁶Mia huo mhanyikelie ki michieta hie, uko kinyi kra selieta zorei.

¹⁷Kekreilamonyü puo siaketa nhie mhapuorei se tuotalie lho, puo kinyiko puo siemedzi tsulie lho.

¹⁸Puo kerhei ki puo thuo puo kelhou tshetuo shierei, no rei kruokelie ki mia n tsheya ze ru.

¹⁹Uko vo uko pfutsanuoko ze puo chütatuo; uko mhakipuorei kezieu ngu lalie lho.

²⁰Themia puo mhanyi ba shierei, nhachü katayakezhako mhie zo.